Ўзбекистон халқ таълими вазири ўринбосари Алишер Саъдуллаев ҳамда Фан ва технологиялар агентлиги бош директори ўринбосари Олимжон Тўйчиев янги лавозимдаги илк 100 кунлик фаолиятлари учун ўз олдиларига қўйилган вазифа ва мақсадлар ҳақида журналистларга маълум қилди. Улар билан учрашув Халқаро пресс-клубнинг 3 июль куни бўлиб ўтган анжумани доирасида бўлиб ўтди.
22 ёшли Алишер Саъдуллаевнинг қайд этишича, (Ўзбекистон Ёшлар иттифоқи сифатида қайта ташкил этилган) «Камолот» ёшлар ижтимоий ҳаракатининг 30 июнь куни бўлиб ўтган қурултойи ёшлар учун том маънода муҳим воқеа бўлди. «Бундан кейин Президент билан очиқ гаплаша оламиз, муаммоларимизни тўғридан-тўғри айта оламиз, улар бизнинг ишонган одамимиз бўлдилар», — деди у.
Икки ёш йигитнинг бошқарув лавозимларига тайинланиши ижтимоий тармоқларда қизғин баҳс-мунозараларга сабаб бўлди. «Газета.uz»нинг ёзишича, фойдаланувчиларнинг бир қисми бу йигитлар ваколатли лавозимлар учун ҳали ёшлик қилмасмикин, деб савол қўяётган бўлса, бошқалар ёшларга йўл бериш вақти келганини таъкидламоқда. Алишер Саъдуллаевнинг ўзи эса «кўплаб хабар ва саволлар кела бошлагани сабаб, Facebook’даги аккаунтини ўчириб ташлашга мажбур бўлгани»ни тан олди.
Алишернинг сўзларига кўра, у ўз олдига мақсадлар қўйган, лойиҳалар ва уларни амалга ошириш учун зарур кунлар сони бўйича бир тўхтамга келган. «Ёшлар жамият ҳаётида фаол бўлиши учун қўлимдан келганича ҳиссамни қўшишга ҳаракат қиламан», — дея таъкидлади у.
Вазир ўринбосари ёшлар бир етакчини ажратиб олиб, унга эргашиши эмас, балки бирлашиши керак, деб ҳисоблайди. «Бизда энергия ва энтузиазм бор, курашамиз. 24 соат ишлаш керак бўлса, 25 соат ишлаймиз. Лекин бизга тажриба керак. Тажрибани оқлаш учун ҳам ўрганамиз, ҳар куни тадқиқот қиламиз, ривожланган давлатлардан намуна оламиз», — деди у.
Саъдуллаевга кўра, халқ таълими тизими 5 миллион болани қамраб олган бўлиб, улардан 4 миллиони мактабгача таълим муассасаларига қатнайди. «Биз боғча болаларига кўпроқ эътибор қаратишимиз керак. Улар беш критерия, хусусан, интеллект коэффициенти ва эмоционал интеллект бўйича мактабга тайёр бўлиши керак. Билсам, бизда буларнинг бари бор экан, бироқ уларни амалиётга қўллашимиз керак. Энг муҳими — ота-оналар ва боғча мудиралари, мактаб ўқитувчилари ўртасида боғлиқлик яратишдир», — дея қайд этди вазир ўринбосари.
Алишер Саъдуллаевнинг фикрича, Президент ёшлар вакилини бекордан-бекорга бу лавозимга тайинламаган — давлат раҳбари бу билан ёшлар қўрқмаслиги ва ўз ғояларини баралла айтиши кераклигинини билдирмоқчи бўлган. «Мен олдимга қўйилган вазифани оқлайман. Келаси йил, балки, яна ўнта шундай йигит чиқар. Ўша куни улар Президент олдида чиқиш қилишдан қўрқди. Уларнинг сони бундан-да кўп бўлиши керак. Мен буни исботлашга ҳаракат қиламан», — деди у.
Дастлабки 100 кунлик фаолияти билан боғлиқ режалари билан ўртоқлашаркан, Алишер Саъдуллаев биринчи галда болалар боғчаларидаги аҳволни ўрганиш, янги тизимларни татбиқ этиш, шароитлар билан бевосита танишиш мақсадида вилоятларга сафар қилишини маълум қилди. Дам олиш кунлари у Тошкентдаги бирининг кўрсаткичлари юқори, иккинчисиники эса паст бўлган икки мактабда бўлишга улгурган. «Муаммоларни ўрганиш, қандай йўлни босиб ўтиш кераклигини тушуниб олиш учун улар орасидаги фарқни кўриш керак», — деди вазир ўринбосари.
Олий таълим муассасалари талабалари ҳақида гапираркан, Алишер Саъдуллаев таълим учун сарфланган пулларни қандай қилиб қоплаб бериши ҳақидаги саволлар билан босим ўтказмай, уларни қўллаб-қувватлаш зарурлигини таъкидлади. «Бу саволни бериш нотўғри, биз босим ўтказишимиз керак эмас. Ўз навбатида, шундай саволлар берилган вақтда биз ҳам иккиланмаслигимиз керак. ‘Кимни қўлида ишлар эканман, нима иш қилсам экан?’, деб эмас, ‘Қанча иш ўрни ярата оламан?’, деб яшашимиз керак», — деб ҳисоблайди вазир ўринбосари.
25 ёшли Олимжон Тўйчиев фан ва технологиялар ривожининг мамлакат иқтисодий тараққиётига ижобий таъсири борасида мисол келтирди. Унинг таъкидлашича, Ўзбекистонда мазкур йўналишлар ривожи учун барча имкониятлар, хусусан, ёшларнинг салоҳияти, кўникмалари ва интилишлари бор.
Фан ва технологиялар агентлиги бош директори ўринбосарининг ишончи комил — фан ва технологияларни бутун республика бўйлаб оммалаштирмоқ керак. Бунга бир мисол — ҳар йили анъанавий тарзда ўтказиладиган «Ёш робототехниклар» танловидир.
«Кўпчилик робототехника жуда ҳам қийин соҳа, унга жуда ҳам кўп маблағ керак, уни ўрганиш жуда ҳам қийин, деб ҳисоблайди. Бу фикрга қўшилмаган бўлардим. Ўзим мисолимда айтадиган бўлсам, Бекобод шаҳридаги мактабни тамомлаб, коллежни битириб, Турин политехника университетига кирганимдан кейин роботехника билан шуғуллана бошлаганман», — деди у.
Янги лавозимдаги ишининг биринчи 100 кунида Олимжон Тўйчиев докторантурадаги квоталар тақсимотини қайта кўриб чиқиш, ёш олимлар ва стартапларни қўллаб-қувватлаш бўйича бўлим ташкил этиш, мини-технопарклар очиш билан шуғулланиш ҳамда докторантларни маҳсулот ишлаб чиқарувчи компанияларнинг муаммоларини ўрганишга жалб қилишни мақсад қилган.
Изоҳ (0)