Ўзбекистоннинг бир қатор касб-ҳунар коллежи ва академик лицейида 9-синф битирувчиларидан ҳужжат қабул қилиш тўхтатилди. Бу ҳақда, ўрта махсус ихтисослашган таълим марказига таяниб, Uz24 хабар бермоқда.
Айтилишича, бундай ҳолат Бухоро, Фарғона, Навоий вилоятлари ва Тошкент шаҳрида аниқланган. Таъкидланишича, ҳали вазирликдан тегишли буйруқ келмагани боис кўрсатилган ҳудудлардаги айрим коллеж ва лицейлар ҳужжат қабул қилмай турибди. Самарқанд, Қарши ва Нукуснинг алоҳида коллежларида битирувчилардан ҳужжат қабул қилиш давом этмоқда.
Ўрта махсус ихтисослашган таълим маркази вакилининг сўзларига қараганда, ҳар йили ҳужжат қабул қилиш жараёни 20–30 июнь кунлари бўлиб ўтган. Бу йили 9-синф битирувчилари ота-оналари ўртасида таълимни 11 йилликка қайтариш бўйича ўтказилган сўров якунлари номаълумлиги боис баъзи ўрта махсус таълим даргоҳлари ҳужжат қабул қилиш жараёнини кечиктириб турибди.
«Қонун бўйича, аттестатлар мактаб ўқувчиларининг қўлига топширилмайди, улар мактабда сақланади. Мактабларда 10–11 синфлар очилиши бўйича сўров натижалари маълум бўлиши билан ҳужжат қабул қилиш бошланади», — қўшимча қилди марказ вакили.
Ўз навбатида, халқ таълими вазирлиги вакили ўрта махсус таълим даргоҳида ўқишни истаган битирувчи мактабга келиб, ўқитувчиси билан бирга танланган коллеж ёки лицейга ҳужжат топшириши мумкин, ҳужжат топшириш жараёни эса узайтириб берилади.
«Ҳозир биз ота-оналар ўртасида ўтказилган сўров натижаларини таҳлилдан ўтказмоқдамиз. Натижалар ҳисоб-китобидан сўнг мактабларда 10–11 синфлар очилиши масаласи ойдинлашади», — қўшимча қилди вазирлик матбуот хизмати.
Изоҳ (0)