Зарина Низомиддинова: Шоҳруххон — болаликдаги дўстим

Актриса ва қўшиқчи Зарина Низомиддинова «Darakchi.uz» нашрига берган интервьюсида ҳамкасби Шоҳруххон билан яқин муносабатлари ҳақида тўхталиб ўтди.

Зарина дастлаб Шоҳруххон билан ҳамкорлиги ҳақида гапираётиб, у билан болаликдан дўст эканлигини, биргаликда қилган ҳамма ижодий ишлари доим омадли чиқиши, буни Шоҳруххоннинг ўзи ҳам кўп такрорлашини айтди.

Журналистнинг «Нега айнан Шоҳруххон?» — деган саволига эса қуйидагича жавоб қайтарди:

«У билан ‘Ромео ва Жульетта’ фильмида бирга ишлаганимиздан хабарингиз бор. Ўша йиллардаёқ феъл-атворимиз, дунёқараш ва мақсадларимиз ўхшаш эди. Кўп нарсаларда бир хил фикрлаганимиз учун ҳам ҳамкорликлар бизга қийинчилик туғдирмайди, деб ўйлайман. Бу эса албатта, натижанинг яхши бўлишига асосий пойдевор. Биласизми, Шоҳруххоннинг самимий ва кўнгли тозалигига тан бераман. Машҳурлик уни ўзгартирмаган. Ҳатто, атрофида кимдир, бошқаларни ғийбат қилаётганини эшитиб қолса, уришиб беради. Турмуш ўртоғи Асал Шодиевани ҳам жуда ҳурмат қиламан. Ҳамкасб сифатида муносабатларимиз яхши. Биз оилавий дўстмиз, десам хато бўлмайди».