Қаршининг «Насаф» клуби ўзига қарашли бўлган стадионда катта реконструкция ишларини олиб бориб, Олий лиганинг биринчи давра ўйинларини Ғузорда ўтказиб келаётганди.
Клуб матбуот хизматининг хабар беришича, стадиондаги таъмирлаш ишлари тўлиқ якунига етган ва 30 июнь куни мухлислар янги қиёфа акс этган ўйинга ташриф буюриш имкониятига эга бўлади. Шу куни Ўзбекистон кубогининг чорак финалида «Насаф» «Қўқон-1912» клубини қабул қилади. Учрашув 19:30 да старт олади.
Унга қадар, аниқроғи, 18:00 дан бошлаб стадионнинг очилишига бағишлаб концерт дастури тақдим этилади. Унда «Насаф»нинг ашаддий мухлисларидан бири, машҳур хонанда Даврон Ғоипов чиқиш қилади.
Маълумот учун, «Насаф» стадиони 2006 йил фойсдаланишга топширилган бўлиб, 2009 йил «Насаф» ихтиёрига берилган эди. Бунга қадар стадионга мухлислар сиғими 16 мингни ташкил қилган бўлса, эндиликда бир вақтнинг ўзида 21 000 томошабин футбол томоша қилиш имкониятига эга.
Бунда югуриш йўлакларининг олиб ташлангани ҳам муҳим аҳамият касб этди. Энди футбол мухлислари футболчиларга янада яқинроқ бўлиш имкониятига эга. Стадионга замонавий муҳандислик комуникациялари ўрнатилган бўлиб, футбол майдонига Kentucky bluegrass компаниясининг янги навли чими ётқизилган. Секторларнинг жойлашуви ҳам ўзгаришга юз тутган.
30 июнь куни учрашувни томоша қилишни истаган мухлислар учун тўрт хил турдаги чипталар таклиф қилинади:
- CIP сектордаги ўриндиқлар (900та) — 20 000 сўмдан
- Марказий секторлар (1, 2, 6, 7, 8) — 15 000 сўмдан
- 2-қаватдаги секторлар (12, 13, 14, 15, 16, 17, 18) — 10 000 сўмдан
- Дарвоза ортидаги секторлар (3, 4, 5, 9, 10, 11) — 8 000 сўмдан.
Изоҳ (0)