Qarshining “Nasaf” klubi o‘ziga qarashli bo‘lgan stadionda katta rekonstruksiya ishlarini olib borib, Oliy liganing birinchi davra o‘yinlarini G‘uzorda o‘tkazib kelayotgandi.
Klub matbuot xizmatining xabar berishicha, stadiondagi ta’mirlash ishlari to‘liq yakuniga yetgan va 30-iyun kuni muxlislar yangi qiyofa aks etgan o‘yinga tashrif buyurish imkoniyatiga ega bo‘ladi. Shu kuni O‘zbekiston kubogining chorak finalida “Nasaf” “Qo‘qon-1912” klubini qabul qiladi. Uchrashuv 19:30 da start oladi.
Unga qadar, aniqrog‘i, 18:00 dan boshlab stadionning ochilishiga bag‘ishlab konsert dasturi taqdim etiladi. Unda “Nasaf”ning ashaddiy muxlislaridan biri, mashhur xonanda Davron G‘oipov chiqish qiladi.
Ma’lumot uchun, “Nasaf” stadioni 2006-yil foysdalanishga topshirilgan bo‘lib, 2009-yil “Nasaf” ixtiyoriga berilgan edi. Bunga qadar stadionga muxlislar sig‘imi 16 mingni tashkil qilgan bo‘lsa, endilikda bir vaqtning o‘zida 21 000 tomoshabin futbol tomosha qilish imkoniyatiga ega.
Bunda yugurish yo‘laklarining olib tashlangani ham muhim ahamiyat kasb etdi. Endi futbol muxlislari futbolchilarga yanada yaqinroq bo‘lish imkoniyatiga ega. Stadionga zamonaviy muhandislik komunikatsiyalari o‘rnatilgan bo‘lib, futbol maydoniga Kentucky bluegrass kompaniyasining yangi navli chimi yotqizilgan. Sektorlarning joylashuvi ham o‘zgarishga yuz tutgan.
30-iyun kuni uchrashuvni tomosha qilishni istagan muxlislar uchun to‘rt xil turdagi chiptalar taklif qilinadi:
- CIP sektordagi o‘rindiqlar (900ta) — 20 000 so‘mdan
- Markaziy sektorlar (1, 2, 6, 7, 8) — 15 000 so‘mdan
- 2-qavatdagi sektorlar (12, 13, 14, 15, 16, 17, 18) — 10 000 so‘mdan
- Darvoza ortidagi sektorlar (3, 4, 5, 9, 10, 11) — 8 000 so‘mdan.
Izoh (0)