Қозоғистон сенати конституциявий қонунларга ваколатларни қайта тақсимлаш ҳақидаги тузатишлар киритишни маъқуллади

Қозоғистон парламенти сенати 22 июнь, пайшанба куни «Қозоғистон Республикасининг баъзи конституциявий қонунларига давлат ҳокимияти тармоқлари ўртасида ваколатларни қайта тақсимлаш масалалари бўйича ўзгартириш ва қўшимчалар киритиш тўғрисида»ги қонун лойиҳасини маъқуллади, деб ёзади «ТАСС».

Қонун лойиҳаси «Президент тўғрисида»ги, «Ҳукумат тўғрисида»ги ҳамда «Суд тизими ва судьялар мақоми тўғрисида»ги конституциявий қонунларга тузатишлар киритишни кўзда тутади. Хусусан, республика бюджет комиссиясини ташкил этиш ҳамда республика бюджети ижроси ҳақида йиллик ҳисобот тайёрлаш ва тақдим этиш тартибини белгилаш; давлат миқёсидаги режалаштириш тизимини президент билан мувофиқлаштирилган тарзда белгилаш ваколатларини президентдан ҳукуматга ўтказиш таклиф этилмоқда.

Шу билан бирга, давлат раҳбарига президентга бевосита бўйсунувчи ва ҳисоб берувчи давлат органларининг стратегик режаларини тасдиқлаш ҳуқуқини бириктириш таклиф қилинмоқда. Шунингдек, конституциявий қонун лойиҳаси орқали Олий суд кенгашига президентнинг судьяларга гувоҳнома бериш тартибини белгилаш бўйича ваколатларини ўтказиш кўзда тутилмоқда.

Қонунчиликка кўра, қонун лойиҳаси парламент томонидан қабул қилинган деб ҳисобланади ва имзолаш учун давлат раҳбарига юборилади.