Qozog‘iston senati konstitutsiyaviy qonunlarga vakolatlarni qayta taqsimlash haqidagi tuzatishlar kiritishni ma’qulladi

Qozog‘iston parlamenti senati 22-iyun, payshanba kuni “Qozog‘iston Respublikasining ba’zi konstitutsiyaviy qonunlariga davlat hokimiyati tarmoqlari o‘rtasida vakolatlarni qayta taqsimlash masalalari bo‘yicha o‘zgartirish va qo‘shimchalar kiritish to‘g‘risida”gi qonun loyihasini ma’qulladi, deb yozadi “TASS”.

Qonun loyihasi “Prezident to‘g‘risida”gi, “Hukumat to‘g‘risida”gi hamda “Sud tizimi va sudyalar maqomi to‘g‘risida”gi konstitutsiyaviy qonunlarga tuzatishlar kiritishni ko‘zda tutadi. Xususan, respublika budjet komissiyasini tashkil etish hamda respublika budjeti ijrosi haqida yillik hisobot tayyorlash va taqdim etish tartibini belgilash; davlat miqyosidagi rejalashtirish tizimini prezident bilan muvofiqlashtirilgan tarzda belgilash vakolatlarini prezidentdan hukumatga o‘tkazish taklif etilmoqda.

Shu bilan birga, davlat rahbariga prezidentga bevosita bo‘ysunuvchi va hisob beruvchi davlat organlarining strategik rejalarini tasdiqlash huquqini biriktirish taklif qilinmoqda. Shuningdek, konstitutsiyaviy qonun loyihasi orqali Oliy sud kengashiga prezidentning sudyalarga guvohnoma berish tartibini belgilash bo‘yicha vakolatlarini o‘tkazish ko‘zda tutilmoqda.

Qonunchilikka ko‘ra, qonun loyihasi parlament tomonidan qabul qilingan deb hisoblanadi va imzolash uchun davlat rahbariga yuboriladi.