Шимолий Кореядаги қамоқхонада жазо муддатини ўтаган ва АҚШга қайтгач, тезда вафот этган америкалик талаба Oттo Уормбирнинг оиласи мурдани ёришдан бош тортди. Уормбир 19 июнь, душанба куни вафот этди, унгача у КХДРда 15 ойдан ортиқ вақтни ҳибсда ўтказди, деб ёзади «Корреспондент.net».
Терговчи баёнотида айтилишича, «айни пайтгача Oттo Уормбирнинг ўлими бўйича ҳеч қанақа хулосага келинмаган».
Шимолий Корея 22 ёшли Oттo Уормбирни АҚШга ўтган ҳафта «инсонийлик нуқтаи назаридан» топширди. Бу вақтгача у бир йилга яқин вақт кома ҳолатида бўлган.
Унинг ота-онаси йигит даҳшатли азобларга дучор бўлганини айтди. Охир-оқибат, меҳмонхонадан тарғибот плакатини ўғирлаб кетган Oттo ҳушига келмасдан, ўз ватанида вафот этди.
Шимолий Корея таъкидлашича, Уормбир 2016 йил мартидаги суд мажлисидан кейин кўп ўтмай, ботулизм (фалажликни келтириб чиқарувчи камёб касаллик)ни юқтириб олган. Унга уйқу дори беришган ва ўшандан буён у комадан чиқмаган.
Аммо Oттoни Цинциннатида даволаган шифокорлар гуруҳи йигитда ҳеч қанақа ботулизм белгилари бўлмаганини айтди. Уларнинг фикрича, у «оғир неврологик шикастланиш»дан азоб чеккан, у мия тўқимасининг катта кўламда йўқотилишига олиб келган.
Изоҳ (0)