Huawei компаниясининг Smart Class лойиҳаси самарали, илғор ва технологик таълим йўлида
Телекоммуникация ва ахборот технологиялари лойиҳалари бўйича жаҳонда етакчи саналган Huawei компанияси (Ўзбекистонда — «IP ООО Huawei Tech Investment Tashkent» МЧЖ ХК) мобил қурилмаларни ишлаб чиқаришда ҳам ўз брендини фаол равишда илгари сурмоқда. Бундан ташқари, компания инновацион қарашларидан оғишмаган ҳолда таълим, тиббиёт ва транспорт хизматлари соҳаларида ўз лойиҳа ва ишланмаларини таклиф қилиб келмоқда. Компаниянинг 2012—2014 йилларда Ўзбекистондаги муваффақиятли лойиҳаларидан бири «Электрон таълим» бўлиб (e-Learning), Ўзбекистоннинг 80 дан зиёд олий ҳамда бошқа турдаги ўқув муассасаларида самарали жорий этилди.
Компания 2016 йилдан бошлаб Smart Class концепциясига катта эътибор қаратишни бошлади. Мазкур ёндашув орқали ўқувчилар интерактив режимда устози билан боғланиши, ҳам умумий, ҳам индивидуал топшириқларни бажариши мумкин. Ушбу ғоя ўқувчиларнинг ҳам гуманитар, ҳам технологик соҳаларда ривожланиб, маълум фанни чуқурроқ ўзлаштиришига хизмат қилади. Тошкент шаҳрида жойлашган, ҳамда хитой тилини чуқур ўргатишга ихтисослаштирилган 59-сонли умумтаълим мактаби биринчилардан бўлиб Huawei компаниясининг Smart Class концепциясидаги синфига эга бўлди. Келаси ўқув йилидан бошлаб мактабда дастурий таъминот ва смарт ишланмалар ўқувчиларнинг фанни ўзлаштириш салоҳиятига катта кўмак бериши кутилмоқда.
Таъкидлаш лозимки, Huawei компанияси 2016 йилда смарт технологиялари ишланмаси асосида Тошкент ахборот технологиялари университети қошида HAINA академиясини очди. Бу ерда ҳар йили телекоммуникациялар бозори учун 200 дан зиёд мутахассисни тайёрлаб чиқариш режалаштирилган.
«Компаниямиз бир жойда тўхтаб тургани йўқ. Ўтган йили биз Тошкент ахборот технологиялари университети билан ҳамкорликда тармоқ Академиясини очдик, Плеханов номидаги университет учун ўзимизнинг смарт ишланмаларимиз ва видео-конференция тизимини таклиф этдик. Бу йил биз умумтаълим мактаблари учун Smart Class концепциясини илгари сурмоқдамиз. Умид қиламизки, бошланғич лойиҳамиз ёш ўқувчиларни янги ва замонавий билимларни олишда, ҳамда самарали ривожлантириш учун фойдали бўлади. Келажакда биз Халқ таълими вазирлиги билан ҳамкорликда Smart Class концепциясини Ўзбекистоннинг бошқа вилоятларида ҳам жорий этишга тайёрмиз», — дейди «Huawei Tech Investment Tashkent» компанияси бош директори жаноб Ван Пен.
59-сонли умумтаълим мактабига ташриф буюрганлар Smart Class концепциясидан ташқари, Хитой Халқ Республикасининг Ўзбекистондаги элчихонаси томонидан тақдим этилган лингафон кабинети билан ҳам танишиш имкониятига эга бўлди.
Huawei компаниясининг «Электрон таълим» лойиҳаси ҳақида:
Huawei компанияси АКТ ва мобил технологиялар соҳасидаги илмий тадқиқотлар ва ишланмаларга катта эътибор қаратиши билан дунё миқёсида ажралиб туради. Ўзбекистонда 15 йиллик фаолиятга эга бўлган ва энг инновацион бренд ҳисобланган Huawei компанияси биринчилардан бўлиб «Электрон таълим» лойиҳасини ишга туширди. «Электрон таълимнинг миллий тармоғи» лойиҳасини амалга ошириш натижасида 80 дан зиёд ўқув муассасалари (олий ва ўрта махсус таълим вазирлиги, Ўзбекистон Рсепубликаси Президентининг «Истеъдод» жамғармаси ва 3 та ўқув маркази) 1 Гбит/с гача тезликдаги «Электрон таълим» ягона корпоратив тармоғига уланди. Ҳар бир олий ўқув юртида VKС Huawei негизида мультимедиа аудиториялари яратилди.
Реклама ҳуқуқи асосида
