Skyтах агентлиги Air Astana’ни Марказий Осиёнинг энг яхши авиакомпанияси деб топди

Британиянинг Skytrax консалтинг агентлиги жаҳоннинг энг яхши авиакомпаниялари рейтингини тузиб чиқди. Бу ҳақда «Газета.ru» хабар бермоқда.

Шарқий Европадаги энг яхши авиакомпания мақомига 2017 йилда Россиянинг «Аэрофлот» авиакомпанияси эга бўлди. Рейтингда ундан кейинги ўринларни LOT Polish ва S7 Airlines эгаллади.

Шарқий Европанинг энг кучли ўн авиакомпанияси қаторига, шунингдек, Air Serbia, Wizz Air (Венгрия), Croatia Airlines, CSA Czech Airlines, «Победа» (Россия), Adria Airways (Словения) ва Tarom (Руминия) кирди.

Жаҳоннинг энг яхши авиакомпанияси этиб эса Qatar Airways танланди. У глобал ва Яқин Шарқ минтақавий рейтингида биринчи ўринга муносиб кўрилди.

Иккинчи ўринда Singapore Airlines, учинчи ўринда эса ANA (Япония) турибди. Бешликка, шунингдек, Emirates (БАА) ва Cathay Pacific (Гонконг) кирди. Кучли ўнликдан ўрин олганлар қаторида EVA Air (Тайвань), Lufthansa (Германия), Etihad Airways (БАА), Hainan Airlines (Хитой) ва Garuda Indonesia бор.

Африканинг энг яхши авиакомпанияси Ethiopian Airlines бўлди, Осиёда бу мақомни Singapore Airlines, Австралия ва Океания — Virgin Australia қўлга киритди. Ғарбий Европа рейтингида биринчи поғонани Lufthansa, Марказий Осиё ва Ҳиндистон рейтингида эса Air Astana (Қозоғистон) банд этди.

Шунингдек, Шимолий Американинг энг яхши авиакомпаниялари рейтингининг бошида Air Canada, Жанубий Америка бўйича Avianca (Колумбия), Марказий Америка ва Кариб ҳавзаси мамлакатлари бўйича Copa Airlines (Панама) турибди.