Йигитали Мамажонов: Райҳонга уйланишдан заррача машҳурликни кўзламаганман

Актёр Йигитали Мамажонов «Дарё» интернет-нашри учун эксклюзив интервью берди. Интервью журналист Феруз Муҳаммад томонидан уюштирилди.

Суҳбат давомида актёр хонанда Райҳон билан кечган биринчи турмуши ҳақида ҳам тўхталиб ўтди. Йигиталининг сўзларига кўра, унинг таниқли хонандага уйланишдан мақсади машҳурликка эришиш бўлмаган.

Йўқ, заррача ҳам ундай эмас. Кичкиналигимдан менга ёрдам қилишларини хоҳламас эдим, кимдир ёрдам қилмоқчи бўлса: «Йўқ, керак эмас, ўзим қиламан!», дердим. Битта иш қиляпманми, мисол учун ер кавлаяпманми, шу ишга иккинчи одамни аралаштирмасдан ўзим қилардим. Чунки шу ишни мен бажармасам, бу меники бўлмай қолади. Менинг Райҳон билан танишувим шунчаки бир иш ёки машҳурлик учун кўзланган ҳаракат эмас эди — бу муҳаббатдан эди.

Аввало, машҳурлик инсонга боғлиқ эмас. Масалан, кўп машҳур актрисаларнинг эрлари машҳур эмас — нари борса ора-орада бир икки гапириб туради, холос. Машҳурлик аввало Худодан — агар Аллоҳ хоҳласа, назари тушса, ўзи машҳурлик беради. Бу нарса инсонга боғлиқ эмас. Мен ўзимни кучимга ишонган инсонман.

Йигитали Мамажонов, актёр

Актёр суҳбат давомида болалиги, оиласи, хонанда Райҳон билан ажрашгандан сўнг нима учун чет элга кетиб қолгани, Чимкентда очган гул дўкони, қўшимча бизнеслари, кино ҳамда клиплардаги фаолияти ҳамда бўлажак турмуш ўртоғи ҳақида тўхталиб ўтган.