Тошкентнинг Кичик ҳалқа йўлида 15 июнь, пайшанба куни инсон ўлими билан боғлиқ йўл-транспорт ҳодисаси юз берди. Ҳодиса видеоёзуви Facebook’даги «Водители Ташкента» гуруҳида эълон қилинган.
Видеода каттароқ бола ўзидан кичик болакайни қўлда кўтариб кетаётгани, сўнг болакайни ерга қўйганида, у югуриб кетганини кўриш мумкин. Болакай югуришда давом этаркан, унинг олдидан пайдо бўлган Matiz болакайни босиб кетди.
Ҳодиса юз бериши билан Matiz ҳайдовчиси автомобилдан тушиб келиб, болакайни машинага ётқизган ва уни ҳодисага гувоҳ бўлган яна бир киши билан бирга касалхонага олиб кетган. Видеода болани ердан кўтаришган вақтда ҳаракатсиз эканини пайқаш мумкин.
«Водители Ташкента»да хабар қолдирган фойдаланувчи болакай олинган жароҳатлар оқибатида 16 июнга ўтар кечаси вафот этганини маълум қилган.
Ҳодиса Facebook’даги автоҳаваскорлар гуруҳида жиддий муҳокамаларга сабаб бўлган. Фойдаланувчиларнинг аксарияти ҳодисада Matiz ҳайдовчисини айблаб чиққан. Уларнинг фикрича, ҳайдовчи эътиборлироқ бўлиши зарур эди.
Бошқа бир гуруҳ фойдаланувчилар мазкур ҳодисада фақат ҳайдовчини айблаш тўғри эмаслигини таъкидлаган. «Бу вазиятда эътиборсиз ота-оналарнинг, болани бошқа бир болага ишониб топширган катталарнинг ҳам айби бор», — деб ёзади улардан бири.
Изоҳ (0)