Фотогалерея: Дунёга машҳур асранди фарзандлар

AdMe нашри охири яхшилик билан тугаган, машҳурлик ва муваффақиятга эришган асранди фарзандлар ҳақида маълумот тўплаб тақдим этди.

Стив Жобс ва унинг биологик отаси Абдулфаттоҳ Жандали

Стив Жобс 1955 йил 24 февралда Сан-Францискодаги хусусий шифохонада туғилган. Унинг биологик онаси, талаба Жоан Шибле ота-онасининг босими сабаб фарзандидан воз кечишга мажбур бўлган. Қизи суриялик Абдулфаттоҳ Жандалидан ҳомиладор бўлиб қолганини билган ота-она уни меросдан маҳрум қилиш билан қўрқитган.

Стивнинг ўгай отаси Пол Жобс болакайни электроникага бўлган муҳаббатини шакллантиришда муҳим рол ўйнаган ва унинг таълим олиши учун пул тўлаган. Стив Жобсга ота-онаси уни «асраб олинган» дейишлари жуда ёқмаган: «Улар менинг 100 фоиз ҳақиқий ота-онам».

Николь Ричи ва унинг биологик отаси Питер Майкл Эсковедо

Николь Ричининг ота-онаси уни 3 ёшига қадар тарбия қилган. Шундан сўнг уни ўз дўсти Лайонел Ричига васийликка беришган. Бунга оғир молиявий вазият сабаб бўлган. Олти йил ўтгач Лайонел Ричи ва унинг хотини Бренда Харви-Ричи Николни расман асраб олишган, унинг чўқинтирган отаси эса Майкл Жексон бўлган.

Жейми Фокс

Америкалик машҳур актёр Жейми Фокс Техасда Луиза Диксон ва Деррел Бишоп оиласида туғилган. Туғилганидан кўп ўтмай ота-она Жеймидан воз кечган ва уни Марк Тэлли ҳамда Эсфирь Марилар оиласига топширган.

Рэй Лиотта

Рэйнинг биологик ота-онаси болакайни тарбия қила олмагани сабаб унда воз кечган. Рэйни ўзига тўқ итальян оиласи Линда исмли қиз билан биргаликда асраб олган.

Коко Шанель

Дунёдаги энг машҳур дизайнер аёл бўлмиш Коко 1883 йилда Сомюрда туғилган. Унинг ота-онаси ўз фарзандларини таъминлай олмагани (оилада Кокодан ташқари яна 4 нафар фарзанд бўлган) сабаб болакайлар асосий вақтини қариндошлариникида ўтказган. Коко 12 ёшга тўлганида отаси оилани ташлаб кетган, қизалоқни эса интернатга топширишган. Коконинг сўзларига кўра айнан шу воқеа ўз соҳасини танлашига туртки бўлган: бутун умр кулранг кийимда юришга мажбур бўлган қиз дунёдаги барча аёлларни чиройли кийинтиришни орзу қилган.

Жон Леннон

Жон туғилганидан кўп ўтмай унинг ота-онаси ажрашиб кетган. Онаси бошқа бир эркакни топгач, болакайни Мими холасига топширишган. Ленноннинг сўзларига кўра, Мими жуда қаттиққўл бўлган ва болакайнинг гитара чалишини маъқулламаган. Жоннинг эслашича, холаси доим «Гитара — яхши буюм, бироқ у пул топишингга ёрдам бермайди!» дея қайтаришни яхши кўрган.