Путин Стоунга берган интервьюсида фарзандлари ҳақида гапирди (видео)

Россия президенти Владимир Путин америкалик режиссёр Оливер Стоунга берган интервьюсида ўз қизлари ҳақида гапириб берди. Интервьюдан парчани 12 июнь, душанба куни Showtime телеканали намойиш қилди.

«Уларнинг ўз оилавий ҳаётлари бор ва биз кўришиб турамиз», — дея Путин қизлари турмушга чиққан-чиқмаганлиги ва улар билан учрашиш-учрашмаслиги ҳақидаги саволга жавоб берди.

Стоун Россия президентидан у неваралари билан бирга ўйнаш-ўйнамаслигини сўради. «Афсуски, жуда камдан-кам», — дея тан олди Путин.

«Куёвларингиз билан тортишиб турасизми?» — деган саволга жавобан, президент шундай деди: «Турли нуқтаи назарлар бўлиб туради. Биз тортишмаймиз, балки мунозара қиламиз».

Режиссёр Путиннинг фарзандлар борасида омади чопганини таъкидлади. «Улар билан фахрланаман», — деди Россия президенти.

Россия президентига бағишланган «Путин билан интервью» (The Putin Interviews) фильми премьераси 12 июнь куни Showtime телеканалида бўлиб ўтди. Картинани Россиянинг «Биринчи канал»и ҳам кўрсатади. Тўрт серияли фильм 19—22 июнь кунлари намойиш қилинади.