Ўзбекистон Президенти Шавкат Мирзиёев Шанхай ҳамкорлик ташкилоти Давлат раҳбарлари кенгаши мажлиси муносабати билан «Остона опера» Давлат опера ва балет театрида намойиш этилган концертни томоша қилди. Бу ҳақда ЎзА хабар бермоқда.
Концертда қозоқ халқ қўшиқлари ҳамда турли халқлар мусиқаси, шунингдек, таниқли мумтоз асарлар куйланди.
Кечада ШҲТга аъзо мамлакатларнинг етакчи ижодий коллективлари иштирок этди. Улар орасида, хусусан, «Остона опера» давлат опера ва балет театри симфоник оркестри ва театр гуруҳлари, Абай номидаги Қозоғистон давлат академик опера ва балет театри, «Остона балет» театри (Қозоғистон), шунингдек, М. Пятницкий номидаги давлат академик рус халқ хори (Россия), «Надам» рақс жамоаси (Ҳиндистон), «Ақақ» қўбизчилар ансамбли (Қирғизистон), Чжесзян провинцияси акробатик санъат труппаси, Хитой опера ва рақс давлат театри (Хитой), «Гулрез» рақс ансамбли (Тожикистон), «Ўзбекистон» мусиқа ва рақс давлат ансамбли ижодкорлари бор эди.
Шанхай ҳамкорлик ташкилоти саммитининг асосий тадбирлари 9 июнда бўлиб ўтади.
Изоҳ (0)