Футбол бўйича Ўзбекистон Биринчи лигасининг 13-туридан жой олган «Сурхон» — «Андижон» ўйинида ҳакам 8 та қизил карточка кўрсатгани ва ҳар икки клубнинг 4 нафардан футболчисини майдондан четлатгани хабар берилганди.
ПФЛ Термиздаги ўйин воқеасини атрофлича ўрганиб чиқди ва оммавий муштлашув иштирокчиларини жазолади. Маълум бўлишича, умумий саккиз футболчидан ташқари «Сурхон» клубининг шифокори ҳам жанжалда фаоллик кўрсатган ва андижонлик футболчилардан бирини жазолаган.
Бунга қадар «Championat.asia» нашри «Сурхон» — «Андижон» ўйинида назоратчи бўлиб ишлаган Шамил Жумаев билан боғланиб, жанжал тафсилотларини билишга ҳаракат қилганди.
Футболчилар ўзини бошқара олмай қолди. Иккала жамоага ҳам ғалаба зарур эди. Натижада жанжал келиб чиқди. Уни андижонлик футболчи бошлади.Голдан кейин ўйин яна икки дақиқа давом этди ва унинг якунига футболчилар бир-бирини қўлини сиқиб хайрлашди.
Шамил Жумаев, учрашув назоратчиси
ПФЛ қарори
ПФЛ регламенти (Тартиб-интизом кодекси 5-модда, 2-бўлим, 5.40 банди ҳамда 5-модда, 4-бўлим, 5.37 банди)ни бузгани учун «Сурхон» ва «Андижон» футбол клублари жаримага тортилди.«Сурхон» клуби ярим ҳимоячиси Тимур Мамадалиев (Тартиб-интизом кодекси 3-бўлим, 5.45 банди ва «и», «п» бандларига асосан) 9 та учрашувга четлатилди ва жаримага тортилди.
«Сурхон» ҳимоячиси Санжар Шомуродов (Тартиб-интизом қўмитаси 3-бўлим, 5.45 банди ва «э», «и», «к», «о» ҳамда «п» бандларига асосан) мавсум охирига қадар четлатилди ва жаримага тортилди.
«Сурхон» ҳимоячиси Нажмиддин Нормуродов 5 та учрашувга дисквалификация қилинди ва жаримага тортилди.
«Сурхон» ҳужумчиси Акмал Абдураҳмонов 2 та учрашувга четлатилди ва жаримага тортилди.
«Сурхон» клуби врачи Фаҳриддин Абдусаматов агрессив ҳатти-ҳаракатлари ҳамда «Андижон» ПФК футболчисига жароҳат етказгани учун эгаллаб турган лавозимидан четлатилди ва бундан буён ЎФФ ҳамда ПФЛ тасарруфидаги мусобақаларда ишлаш ваколатидан маҳрум этилди.
«Андижон» ярим ҳимоячиси Иброҳим Отахонов 4 та ўйинга четлатилди ва жаримага тортилди.
«Андижон» ярим ҳимоячиси Фарҳод Бекмуродов 3 та учрашувга четлатилди ва жаримага тортилди.
«Андижон» ярим ҳимоячиси Санжар Асқаралиев 4 та учрашувга четлатилди ва жаримага тортилди.
«Андижон» ҳимоячиси Акбар Хўжаев 2 та учрашувга дисквалификация қилинди ва жаримага тортилди.
Агар мазкур ҳолат яна такрорланса, «Сурхон» ва «Андижон» клубларига нисбатан янада қаттиққўл чоралар қўлланилади. Шунингдек, ҳар икки клубнинг раҳбарлари ва мураббийлар штаби эгаллаб турган лавозимлари мувофқилиги кўриб чиқилади, деб ёзилган ПФЛ сайтида.
Ташкилот қўллаган жарималари миқдорини одатига кўра ошкор этмаган. «Championat.asia» нашри ПФЛ кўрсатган регламент бандларида қуйидаги сўзлар ёзилганини қайд этган.
Регламент бўйича бу бандларни бузгани учун клубларга қуйидаги жазолар қўлланилади:
а) огоҳлантириш;б) Олий лига, биринчи лига, Ўзбекистон кубоги ўйинларини ўтказишда расмий мажбуриятларни бажаришдан дисквалификация қилиш ёки маълум муддатга футболдан четлатиш;в) жарима — 10.000.000 сўм;г) мураббий лицензиясини қайтариб олиш;д) Ҳар қандай футбол фаолиятидан номаълум муддатга четлатиш.
ПФЛ бу бандларга риоя қилганми ёки йўқ — аниқлик киритилмаган.
Изоҳ (0)