7 июнь тонгида Эрон пойтахтида бир вақтнинг ўзида иккита теракт юз берди. Қуролланган шахсларнинг икки гуруҳи Эрон парламенти биносида ва Теҳрондан жанубда жойлашган Имом Хумайний мақбараси яқинида отишма келтириб чиқарди. Парламент биноси ўраб олинди, мақбарага энг яқин метро бекати эса ёпилди. Ҳужум вақтида парламент иши тўхтаб қолгани йўқ.
Эрон ички ишлар вазири ўринбосари Ҳусайн Зулфиқорийнинг маълум қилишича, террорчилар парламент биносига аёллар либосида кириб келган. «Меҳр» агентлиги маълумотларига кўра, парламент ҳужум қилган гуруҳ тўрт кишидан иборат бўлган ва уларнинг бари йўқ қилинган.
Мавзуга доир: Фото: Теҳронда террорчилардан қутқарилаётган болакай
Терактлар оқибатида етти киши ҳалок бўлган, 40 га яқин киши тан жароҳати олган. Парламентга уюштирилган ҳужум оқибатида беш киши, жумладан, хавфсизлик кучларининг икки вакили ҳалок бўлган. Уларнинг тўрт нафари ҳодиса жойида, бешинчиси эса шифохонада вафот этган. Яна камида 25 киши жабрланган. Имом Хумайний мақбарасида эса икки киши қурбон бўлиб, камида 10 киши тан жароҳати олган.
Эрон ОАВлари қурбонлар рўйхатига террорчиларни ҳам қўшмоқда. Улар орасида — мақбара олдида ўзини портлатиб юборган худкуш аёл; полициячилар отиб ўлдирган ҳужум қилган шахс; ва мақбара олдида сианид ичиб, ўз жонига қасд қилган шахс (отиб ўлдирилган ва сианид истеъмол қилган шахс — бири киши бўлиши мумкин).
Эрон маъмурияти террорчиларнинг учинчи гуруҳи ҳам бўлганини маълум қилди. Бу гуруҳ аъзолари ҳам ҳужум уюштирмоқчи бўлган (уларнинг нишони номаълум), бироқ уларни теракт амалга ошгунича қўлга олишга муваффақ бўлинган. Учинчи гуруҳда неча киши бўлгани ҳам номаълум.
Терактлар учун жавобгарликни ИШИД ўз зиммасига олди. Бу ИШИД томонидан Эрон ҳудудида амалга оширилган илк терактлардир. Эрон Сурия ва Ироқда ИШИДга қарши ҳаракатларда қатнашмоқда. 2017 йил март ойида ИШИД форс тилида мурожаат эълон қилиб, Эронни забт этишга ваъда берган эди.
Изоҳ (0)