Қатар у билан барча алоқаларни узганини эълон қилган мамлакатлар билан муносабатларини кескинлаштирмоқчи эмас. Бу ҳақда Қатар ташқи ишлар вазири Муҳаммад Абдураҳмон Ал Таний маълум қилди, деб ёзади «РИА Новости».
«Қатар вазиятни кескинлаштиришга қаратилган чораларни қабул қилмайди, чунки қардош давлатлар ўртасидаги бундай муаммолар музокаралар даврасида ҳал қилиниши керак, деб ҳисоблайди», — деди вазир «Ал-Жазира» телеканалига берган интервьюсида.
Унинг сўзларига кўра, Қатар ўзига қарши бир томонлама шафқатсиз чоралар кўрилганига ва улар Форс кўрфази мамлакатларига салбий таъсир қилганига қарамай, вазиятни кескинлаштирмайди.
Эслатиб ўтамиз, 5 июнь куни Саудия Арабистони, Миср, Баҳрайн ва БАА террорчилик ташкилотларини қўллаб-қувватлагани учун Қатар билан дипломатик алоқаларини узган эди. Уларнинг қарорига кейинроқ Яман, Ливия, Мальдив Республикаси ва Маврикий ҳам қўшилди.