Ўзбекистон Марказий банки Ягона умумреспублика процессинг маркази (ЯУПМ) ва Ягона халқаро процессинг маркази (ЯХПМ) раҳбариятларидан бир ой муддат ичида Uzcard ва GlobUzCard тўлов тизимларининг биргаликда фаолият олиб боришини, яъни, бир тизимнинг карталарини бошқа тизим терминал тармоғига қабул қилинишини таъминлаш талаби қўйилди. Бу ҳақда Uzcard матбуот хизмати хабар бермоқда.
Эслатиб ўтамиз, Марказий банкининг 8 апрелдаги қарори билан Ўзбекистонда халқаро тўлов тизимлари билан интеграцияланиши айтилган GlobUzCard банклараро универсал чакана тўлов тизими ишлаб чиқилиши бошлангани ҳақида хабар берилган эди. ЯХПМ томонидан бошқариладиган янги тизим Visa, MasterCard, Union Pay, American Express, ва бошқа халқаро тўлов тизимлари билан алоқалар ўрнатиб, чет элда GlobUz банк карталаридан ва Ўзбекистон ҳудудида хорижий банклар карталаридан чет эл валютасида операциялар ўтказишни таъминлаши керак.
ЯУПМ (Uzcard) матбуот хизматининг изоҳ беришича, бир тўлов тизими карталарини бошқа тизим томонидан қабул қилинишини таъминлаш учун ахборот тизимларининг тўлиқ мажмуини ишлаб чиқиш талаб этилади, жумладан:
- шифрлаш ва маълумотларни узатиш жараёни, турли тўлов тизимларининг шифрлаш калитларини сақлаш ва фойдаланиш, иккала тизимни ҳам PCI-DSS ахборот хавфсизлиги стандартларига мувофиқлик бўйича сертификациядан ўтказиш;
- пластик карталар эмиссияси базасини янгилаш ва банкларнинг мавжуд мижозлари учун карталарни қайтадан ишлаб чиқариш;
- тизимнинг барча жабхаларида, яъни карточка чипидаги илова ва терминал қурилмаси дастуридан бошлаб, маълумотлар базаларини бошқариш тизимлари, молиявий ўзаро ҳисоб-китоблар учун маълумотларни шакллантириш ва сақлашгача дастурий таъминотни охирига етказиб қўйиш ва қайта созлаш;
- тўлов тизимларининг барча иштирокчилари ва фойдаланувчиларининг турли даражалардаги ўзаро ҳамкорликдаги фаолияти учун алоқанинг янги каналларини қуриш;
- электрон тижорат, жумладан, мобил дастур ва электрон тўловлар порталлари орқали ҳисоб-китобларни амалга ошириш механизмларини қайта ишлаб чиқиш ва ўзгартириш;
- ҳамкорликда иш олиб боришнинг иқтисодий самарадорлигини ҳисоблаб чиқиш ҳамда тегишли нарх сиёсатини ишлаб чиқиш ва мувофиқлаштириш.
«Uzcard тизими иштирокчилари ва фойдаланувчилари ўртасида йўлга қўйилган ўзаро мустаҳкам муносабатларнинг ўзгариши унинг иш фаолиятида тўхталишлар бўлиши эҳтимоли ва пировардида фойдаланувчиларнинг асосли норозиликларини юзага келишини эътибордан четда қолдирмаган ҳолда, тизимни тубдан қайта қуриш заруратини келтириб чиқаради. Қолаверса, ушбу жараён маблағ ва интеллектуал жиҳатдан сезиларли сарф-харажатларни талаб қилади», — дейилади ЯУПМ ахборотида.
Uzcard томонининг қайд этишича, икки тизимнинг биргаликда фаолият олиб боришини таъминлаш талаби — бир томондан — бир ойдан кўра анча кўп вақт талаб қилса — бошқа томондан — тизимга шошма-шошарлик ва яхши тайёрланмасдан ўзгартириш киритилиши жиддий ижтимоий ва иқтисодий оқибатларни келтириб чиқариши мумкин.
«Юқоридагиларга қўшимча сифатида асосли савол туғилади: GlobUzCard тизими унинг фаолияти учун Uzcard тизими ресурслари талаб қилинаётган бўлса, унга рақобатчи бўла оладими? Ва, умуман, фойдаланувчиларга муайян бир фойда келтирмайдиган бўлса, сарф-харажатлар эвазига ишлаб турган тизимни ўзгартириб, бошқа логотип билан янги карталарни ишлаб чиқаришдан нима наф?», — деб савол қўяди ЯУПМ матбуот хизмати.
«Энг муҳими, модомики, GlobUzCard на тўловларни бошқариш тизими (процессинг маркази), на мижозларнинг маълумотлар базаси ва на тўловларни қабул қилиш тармоқларига эга эмас экан, мазкур тизимларнинг биргаликда фаолият олиб боришини қандай ташкил қилиш мумкинлиги тушунарсиз», — дейилади Uzcard ахборотида.
Изоҳ (0)