GM Uzbekistan автомобиллари энди фақат сўмда сотилади, лекин нархлар долларга «боғланган». 1 июнгача автозавод машиналарининг бир қисми сўмда, бир қисми эса хорижий пластик картадаги валюта (АҚШ доллари) эвазига сотилар эди. Шу сабабли ҳам, 1 июндан камида хорижий валютага сотилган автомобилларнинг нархи ўзгариши тахмин қилинаётган, шу муносабат билан компания янги нархларни эълон қилиши кутилаётган эди. Мазкур мақола тайёрланаётган вақтда GM Uzbekistan’нинг ҳеч бир расмий саҳифасида янги нархлар эълон қилинмаган эди. Янги прайслар ижтимоий тармоқлар ва Telegram’даги оммавий гуруҳларда пайдо бўлди.
Ижтимоий тармоқларда тарқалган прайсларда автомобилларнинг нархи АҚШ долларининг Ўзбекистон Марказий банки курсига «боғлангани»ни кўриш мумкин. Масалан, прайсда Captiva’нинг «доллардаги нархи» 54 594 доллар этиб кўрсатилган — бу камида бир йил ўзгармайдиган қиймат. Долларда кўрсатилган бу нарх Марказий банк курсига чақилса, автомобилнинг 1 июнь ҳолатига кўра сўмдаги нархи 209 миллион 986 минг 540 сўм бўлади. 6 июнь, сешанба кунидан сўмдаги нарх яна ошиши мумкин — Ўзбекистон Марказий банки ҳар сешанба куни хорижий валюталарнинг сўмга нисбатан янги қийматларини белгилайди ва яқин йилларда долларнинг сўмга нисбатан курси қадрсизлангани кузатилмаган.
Ижтимоий тармоқларда тарқалган прайснинг ҳақиқийлигини ҳозирча на GM Uzbekistan ва на «Ўзавтосаноат» тасдиқлади. Шунга қарамай, вилоятлардаги автосалонларга янги нархлар тарқатилган. «Нархлар ўртача 25—30 фоизга ошган. Долларнинг расмий курси ўзгаришига қараб, автомобилларнинг нархи ҳам ҳар ҳафта ўзгариб туради», — дея тасдиқлади Андижон вилоятидаги энг катта автосалонлардан бирининг вакили. «Энг арзон Spark’нинг нархи энди 57 миллион 214 минг сўм», — деди Андижон шаҳридаги автосалонлардан бирининг менежери.
Тўлдириш: GM Uzbekistan сайтида компания автомобилларининг янги нархлари эълон қилинди.
Изоҳ (0)