Қашқадарё вилояти божхона бошқармаси ходимлари томонидан ҳуқуқни муҳофаза қилувчи идоралар ходимлари билан ҳамкорликда гиёҳвандлик воситаларининг ноқонуний олди-сотдиси билан шуғулланиб келган жиноий гуруҳ фаолиятига чек қўйди. Бу ҳақда Қашқадарё вилояти божхона бошқармаси матбуот хизмати хабар бермоқда.
Аниқланишича, 50 ёшни қаршилаган Қарши шаҳрида истиқомат қилувчи фуқаро Қ.Раҳимов (исм-шарифи ўзгартирилган) гиёҳвандлик воситасини сотишда ўзига хос йўлдан фойдаланган. У Қарши шаҳридаги йўналишдаги автобуслардан бирини бошқариш билан бирга, иш жараёнида йўл-йўлакай «мижоз»ларига гиёҳвандлик воситаларини сотиш билан ҳам шуғулланган.
Олиб борилган тезкор тадбир давомида, Қ.Раҳимовнинг яшаш хонадонидан ҳаммом томи ва девор устига хуфёна тарзда қоғозларга ўралган ҳолдаги ҳамда ўн икки дона гугурт қутисига солинган, шунингдек ҳовлидаги иситиш тизими хонасининг яширин жойларига икки газетага ўралган ҳолда хуфёна жойлаштирилган 153,2 граммдан иборат бўлган гиёҳвандлик моддаси аниқланди.
Шунингдек, тадбирда унинг доимий мижози бўлган фуқаро С.Қўлдошевнинг эгнидаги кийимининг чўнтакларидан уч дона гугурт қутига жойлаштирилган ва бир дона минг сўмлик купюрага ўралган ҳамда унинг яшаш хонадонидан икки дона қоғоз бўлагига ўралган оғирлиги 9 граммдан иборат гиёҳвандлик моддалари ашёвий далил сифатида олиб қўйилди.
Вилоят ИИБ ЭКБнинг эксперт хулосаларига кўра, фуқаролар Қ.Раҳимов ҳамда С.Қўлдошевдан ашёвий далил сифатида олинган гиёҳвандлик воситалари марихуана гиёҳвандлик моддаси эканлиги маълум бўлди.
Ҳозирда мазкур ҳуқуқбузарлик ҳолатлари юзасидан божхона текширувлари ва суриштирув ишлари олиб борилмоқда.
Изоҳ (0)