«Ўзбекнефтгаз» миллий холдинг компанияси 2017—2020 йилларда Шўртан газ-кимё мажмуаси қувватини деярли тўрт марта оширади, деб ёзади «Газета.uz» Тошкентда бўлиб ўтган Global Oil Gas халқаро кўргазмасида эълон қилинган маълумотларга таяниб.
2021 йилгача газ-кимё мажмуаси 450 минг тонна полимер маҳсулотларни чиқаради, шунингдек, йилига 50 минг тонна пиролиз дистиллятини чиқаришни ўзлаштиради. Қарийб 1 миллиард долларлик лойиҳа Ўзбекистон Тикланиш ва тараққиёт жамғармаси кредитлари ва «Ўзбекнефтгаз»нинг ўз маблағлари ҳисобидан молиялаштирилади. Айни пайтда кенгайтирилган базавий лойиҳа ишлаб чиқилмоқда, қурилиш ишлари 2018 йилнинг иккинчи чорагида бошланиши режалаштирилган.
Соҳа экспертлари ҳисоб-китобларига кўра, Шўртан газ-кимё мажмуаси қувватининг бунчалик кескин ўсиши ишлаб чиқаришга Қашқадарё вилоятида барпо этилаётган GTL (gas-to-liquid) заводидан синтетик нафтани жалб этиш орқали таъминланади.
«Мажмуа корхоналарининг кенгайтирилиши қурилаётган GTL-завод билан интеграцияланади, бу эса Ўзбекистонда биринчи нефть-кимё кластерини яратиш имконини беради», — деди «Ўзбекнефтгаз» холдинги бошқарув раиси Алишер Султонов кўргазма доирасидаги конференцияда.
Изоҳ (0)