Халифа Хафтар қўмондонлиги остидаги Ливия миллий армияси вакили Аҳмад Ал-Месмари мамлакат жанубидаги авиабазага қилинган ҳужум оқибатида камида 141 киши ҳалок бўлганини маълум қилди. Бу ҳақда AFP’га таяниб, «РИА Новости» хабар берди.
«Аскарлар ҳарбий параддан қайтаётган эди. Улар қуролсиз эди. Уларнинг аксарияти ҳалок бўлди», — дея Ал-Месмари сўзларидан парча келтирди агентлик.
Унинг сўзларига кўра, ҳалок бўлганлар орасида авиабазада ишлайдиган ёки унинг атрофида яшайдиган тинч аҳоли ҳам бўлган.
Ливия миллий келишув ҳукумати раҳбари Фаёз ас-Сараж авиабазага уюштирилган ҳужум сабаб Мудофаа вазири Ал-Маҳди ал-Баргасини вазифасидан четлатди.
19 май, жума куни миллий келишув ҳукумати авиабазага ҳужум уюштириш борасида ҳеч қандай буйруқ бермаганини эълон қилганди. Триполидаги президент кенгашининг баёнотига кўра, мамлакат жанубида юз берган ҳодиса «ҳарбий харажатларни ошишига олиб келади ва миллий ярашув жараёнини чигаллаштиради».
Ҳозирда Ливияда иккита ҳокимият мавжуд — мамлакат шарқидаги Тобрук шаҳрида халқ томонидан сайланган парламент, ғарбда, пойтахт Триполида эса БМТ ва Европа кўмагида мамлакатни бошқараётган Фаёз Сараж бошчилигидаги миллий келишув ҳукумати.
Мамлакат шарқидаги ҳукумат Триполидан алоҳида ҳаракат қилади ва Халифа Хафтар бошчилигидаги миллий армия билан ҳамкорлик қилади.
Изоҳ (0)