Ҳуқуқни муҳофаза қилиш органлари 13 ва 14 май кунлари Тошкентнинг энг гавжум савдо-кўнгилочар савдо мажмуалари — MegaPlanet ва Samarqand Darvoza’га хавотир билан ташриф буюришга мажбур бўлди. MegaPlanet’га «ташриф»ни ОАВ Миллий хавфсизлик хизматидаги манбаларга асосланиб «ўқув машғулоти» деб атаган бўлса, Samarqand Darvoza’га уюштирилган «мажбурий сафар» ҳақида бир неча кун аввал Тошкент шаҳар ИИББ расмий ахборот берган эди.
MegaPlanet’даги «ўқув машғулотлари» ёлғон хабардан сўнг ташкил этилган эвакуация ва текширув операцияси бўлиб чиқди. 13 май куни UzNews нашри Миллий хавфсизлик хизматидаги манбаларга асосланиб, Юнусободдаги MegaPlanet савдо-кўнгилочар мажмуасида ҳуқуқни муҳофаза қилиш органларининг ўқув машғулотлари ўтказилаётгани ҳақида хабар берган эди. Бироқ бу ўқув машғулотлари эмас, балки ҳақиқий операция экани Тошкент шаҳар ИИББда 18 май куни ташкил этилган брифингда маълум бўлди.
ИИББ бошлиғи ўринбосари, полковник Дониёр Тошхўжаевнинг маълум қилишича, 13 май куни соат 10:00 атрофида ўзини Шодмонова Шаҳрина Алишер қизи деб таништирган номаълум шахс ИИББнинг 102 рақамига қўнғироқ қилиб, MegaPlanet’нинг 3-қаватида ҳижобга ўранган икки аёл бинода бомба борлиги ҳақида гаплашаётганини эшитиб қолганини маълум қилган. Шундан сўнг Ички ишлар вазирлиги, ИИББ ва бошқа хизматларнинг кучлари зудлик билан MegaPlanet’га етиб келган, одамлар бинодан эвакуация қилинган. Махсус воситалар билан ўтказилган текширув бинода портловчи ускуналар ва моддалар йўқлигини кўрсатган.
«Ҳижобга ўранган икки аёлнинг бомба ҳақидаги суҳбати» бўйича телефон қўнғироғи 14 май, якшанба куни ҳам такрорланган. Шу куни соат 11:00 атрофида 102 рақамига қўнғироқ бўлиб, Samarqand Darvoza гипермаркетининг 3-қаватида ҳижобга ўранган икки аёл бинода бомба борлиги ҳақида гаплашаётгани ҳақида маълумот қолдирилган. Бу сафар ҳам хабар берган шахс ўзини Шодмонова Шаҳрина Алишер қизи деб таништирган. Бир кун аввал MegaPlanet’да бўлганидек, тегишли органлар зудлик билан Samarqand Darvoza’га етиб борган, одамларни бинодан эвакуация қилган ва бинода бомба йўқлигини аниқлаган.
Мазкур ёлғонлар хабарлар натижасида давлат ва жамият манфаатларига 40 миллион сўмдан зиёд моддий зарар етказилган. Дониёр Тошхўжаевнинг маълум қилишича, зарарни фуқаро ҳисобидан тўла қоплаш бўйича чоралар кўрилади. «Ички ишлар органларининг куч, воситалари кетгани ҳам майли, бироқ мана шу ёлғон хабарлар сабаб бечора одамлар ваҳимага тушди, қанчадан қанча сарсонгарчиликка йўл қўйилди», — дея алоҳида таъкидлади ИИББ бошлиғи ўринбосари.
Ҳар иккала ёлғон хабар муқаддам судланган бир аёл томонидан берилган. Ички ишлар органлари олиб борилган тезкор тадбирлар натижасида мазкур ғайриқонуний ҳаракатлар Ақмарал Исабекова исмли аёл томонидан содир этилгани аниқланди. 18 май куни бўлиб ўтган брифингда у бунгача ўғрилик жиноятини содир этгани учун судланган. Тошкент шаҳар ИИББ сайтида 16 май куни эълон қилинган ахборотда, Samarqand Darvoza’га бомба қўйилгани ҳақида хабар берган аёл Тошкент вилоятида истиқомат қилиши, 1998 йилда туғилгани таъкидланган. Аёлнинг бомбалар ҳақида нима учун ёлғон хабар бергани маълум қилинмади. Ҳуқуқбузар қамоққа олинган, унга нисбатан Жиноят кодексининг 277-моддаси 3-қисми «а» банди («безорилик») билан жиноят иши қўзғатилган.
Samarqand Darvoza’га бомба қўйилгани ҳақида 21 март куни ҳам ёлғон хабар берилган эди. 102 рақамига қўнғироқ қилган аёл ўзини Ойгул Муродова деб таништирган, гипермаркетда қора кийимли «нотаниш шахслар» бинога бомба қўйиш кераклиги ҳақида гаплашаётганини маълум қилган. Тезкор тадбир давомида мазкур хабар ёлғон экани аниқланган, хабар берган аёл қўлга олинган. Эътиборга молик томони, ўша ёлғон хабар юзасидан қўлга олинган ва қўнғироқ вақтида Ойгул Муродова деб таништирган 1998 йилда туғилган шахснинг фамилияси Исабекова экани, исми эса «А» ҳарфидан бошланиши, асли Тошкент вилоятида истиқомат қилиши Тошкент шаҳар ИИББ вакиллари томонидан эълон қилинган эди.
21 мартдаги ёлғон хабар муаллифи А.Исабекова билан 13—14 майлардаги ёлғон хабарлар муаллифи Ақмарал Исабекова бир одамми ёки йўқ — ҳозирча номаълум.
Изоҳ (0)