Ўзбекистонлик бир гуруҳ болалар — жами 100 га яқин киши — Туркманистоннинг «Аваза» Миллий сайёҳлик зонасига ёзги ҳордиқ учун етиб келди, деб ёзади «Газета.uz» Туркманистон давлат ахборот агентлигига таяниб.
Ўзбекистон Бош вазири ўринбосари — Хотин-қизлар қўмитаси раиси Танзила Норбоева раҳбарлигидаги делегация Туркманистон президенти Гурбангули Бердимуҳамедов таклифи билан етиб келди. Таклиф Ўзбекистон Президенти Шавкат Мирзиёев билан май ойи бошида бўлиб ўтган телефон суҳбати чоғида билдирилган эди.
Ўшанда Туркманистон етакчиси Туркманистондаги Каспий денгизи қирғоқларида экологик тоза ҳудудларда жойлашган болалар соғломлаштириш марказлари, коттеж мажмуалари ва ҳашаматли меҳмонхоналар ўзбекистонлик мактаб ўқувчиларини таътил учун қабул қилишга тайёрлигини айтган эди.
Бухоро, Навоий, Хоразм ва Қорақалпоғистондан келган болаларни «Даянч» болалар соғломлаштириш марказига жойлаштиришди. Аваза меҳмонларини ҳордиқ давомида курорт бўйлаб экскурсия, маданий ва спорт тадбирлари, енгил атлетика ва сузиш бўйича мусобақалар, танловлар, адабиёт кечалари ва сафарлар кутмоқда.
Ўзбекистонлик ўқувчилар Авазада 25 майга қадар қолади.
Изоҳ (0)