Интеллектуал мулк объектларига бўлган ҳуқуқларнинг божхона органлари томонидан ҳимоя қилинишига бағишланган давра суҳбати бўлиб ўтди

Давлат божхона қўмитасида интеллектуал мулк объектларига бўлган ҳуқуқларни божхона органлари томонидан ҳимоя қилиш бўйича амалга оширилаётган чора-тадбирларга бағишланган кенгайтирилган тартибдаги давра суҳбати бўлиб ўтди. Бу ҳақда Ўзбекистон Республикаси Давлат божхона қўмитаси матбуот хизмати хабар бермоқда.

Марказий божхона лабораторияси томонидан ташкил этилган мазкур тадбирда интеллектуал мулк объектларига бўлган ҳуқуқ эгалари ва уларнинг ишончли вакиллари, тадбиркорлар, божхона расмийлаштируви бўйича мутахассислар ва кенг жамоатчилик вакиллари иштирок этди.

Тадбирда асосий эътибор интеллектуал мулк объектларига бўлган ҳуқуқларни ҳимоя қилишда божхона қонунчилигидаги мавжуд нормалар, хусусан Ўзбекистон Республикасининг Божхона кодексида белгиланган тартиблар ва уларни қўллашга доир муҳим тавсияларга қаратилди.

Ўзбекистон 1991 йилда Жаҳон интеллектуал мулк ташкилоти аъзолигига қабул қилинган бўлса, 2005 йил 19 апрелдан Адабий ва бадиий асарларни муҳофаза қилиш тўғрисидаги Берн конвенцияси қоидалари Ўзбекистонда амал қила бошлади. Мамлакатнинг мазкур конвенцияга қўшилиши муаллифлар ва уларга тенглаштирилган бошқа ҳуқуқ эгаларига катта имкониятлар яратди.

Айни пайтда ўзбекистонлик муаллифлар асарларидан конвенцияга аъзо 170 дан ортиқ давлат ҳудудида тегишли ҳуқуқларга риоя этилган ҳолда фойдаланилмоқда.

Бир йил муқаддам амалиётга тадбиқ қилинган Божхона кодексида божхона қонунчилигидаги муҳим янгилик – интеллектуал мулк объектларига бўлган ҳуқуқларни ҳимоя қилишга доир янги нормалар алоҳида боб сифатида киритилган.

Айни пайтда Давлат божхона қўмитаси томонидан «Интеллектуал мулк объектларининг божхона реестри» электрон шаклда юритилмоқда ва ушбу реестр Давлат божхона қўмитасининг расмий веб-сайтининг Очиқ маълумотлар бўлимига мунтазам жойлаштириб келинмоқда.

Ҳуқуқ эгаларининг аризасига асосан «Интеллектуал мулк объектларининг божхона реестри»га ҳозирда 86 та товар белгиси киритилган.

Тадбирда мавзу юзасидан кўргазмали тарзда батафсил маърузалар тингланди ва иштирокчилар ўзларини қизиқтирган кўплаб саволларга атрофлича жавоблар олди.