Туркия аскарлари ва уларнинг оилалари Германияда сиёсий бошпанага эга бўлди. Бу ҳақда Süddeutsche Zeitung нашрига таяниб, «РБК» хабар берди.
2016 йил июлида давлат тўнтаришига ҳаракатдан сўнг, турк ҳарбийлари Германиядан сиёсий бошпана сўраб мурожаат қила бошлади. Нашрнинг қайд этишича, ариза берган Туркия фуқаролари шундоқ ҳам яхши бўлмаган Анқара ва Берлин муносабатларини ёмонлаштириши мумкин.
Январь охирида Туркия Мудофаа вазири Фикри Ишик Германия турк офицерларига бошпана беришни рад этиши кераклигини таъкидлаганди. Ишикнинг сўзларига кўра, улар давлат тўнтаришига алоқадорликда айбланмоқда.
2016 йилнинг ёзидан бери 414 турк аскари, дипломати, судьялари ва мансабдорлари ҳамда уларнинг оила аъзолари Германиядан сиёсий бошпана сўраб мурожаат қилган.
Май ойида Туркия президентининг матбуот котиби Иброҳим Қалин Германия Фатҳуллоҳ Гуленнинг фитнага алоқаси бор эканлигини тан олмай, Туркиядаги давлат тўнтариши ташкилотчиларини қўллаб-қувватлаётганини маълум қилганди.
Ўз навбатида Германия федерал разведка хизмати раҳбари Бруно Каль Туркиядаги тўнтаришга уринишга Гуленнинг алоқаси борлиги ҳақида ҳеч қандай исбот йўқ эканлигини айтган эди.
Изоҳ (0)