Бухорода 4 май куни вилоят хотин-қизлар қўмитасининг бошқарув йиғилиши бўлиб ўтди, дея хабар бермоқда вилоят ҳокимлиги ахборот хизмати.
Йиғилишда сўзга чиққан Ўзбекистон Хотин-қизлар қўмитаси раиси, бош вазир ўринбосари Танзила Норбоева мамлакат ижтимоий-иқтисодий ҳаётида хотин-қизларнинг ўрни алоҳида аҳамият касб этаётганлигини қайд этиш асносида, олиб борилаётган ислоҳотлар шароитида вилоят қўмитаси аъзоларининг фаоллиги талаб даражасида эмаслигини таъкидлаб ўтди.Хусусан, қўмита аъзолари ўз фаолиятларини асосан ижтимоий фаол, уюшган аёллар қатлами атрофида юритиб, хонадонлар билан ишлаш, аҳоли орасига чуқур кириб боришга эътибор қаратмаган.
«Танзила Норбоева ўз нутқида хотин-қизлар репродуктив саломатлиги, она ва бола муҳофазаси, оилаларда соғлом маънавий муҳитни қарор топтириш, касб-ҳунар коллежларини битирган қизларни иш билан таъминлаш, уларни оилавий ҳаётга тайёрлаш масалаларига алоҳида эътибор қаратиб, аёллар жиноятчилиги, ўз жонига қасд қилиш ҳолатларига қарши тизимли кураш олиб бориш, бу борада айниқса нотинч оилаларни аниқлаб, улар билан алоҳида иш олиб бориш зарурлигини уқтирди», — дейилади ҳокимлик ахборотида.
Изоҳ (0)