Самарқанд вилояти ИИБ ходимлари томонидан Ургут туманида ўтказилган тезкор тадбир давомида ноқонуний валюта савдоси билан шуғулланаётган бир гуруҳ шахслар қўлга олинди. Бу ҳақда Ўзбекистон ИИВ матбуот хизмати хабар бермоқда.
Гуруҳ аъзолари бўлган 1957 йилда туғилган Қ.Р., 1984 йилда туғилган Ў.Р. ва 1988 йилда туғилган Ф.Р. ўз фаолиятини Ургут туманининг «Янги кийим кечак» бозори атрофида олиб борган. Хабар беришларича, улар Камангарон қишлоғида ноқонуний валюта айирбошлаш вақтида қўлга тушган.
Гумонланувчилар Самарқанд туманида яшовчи 1984 йилда туғилган фуқаронинг Lacetti русумли, давлат рақам белгиси бўлмаган автомашинаси салонида 16 500 АҚШ долларини 130 350 000 сўмга ноқонуний айирбошлаб бераётган вақтда ички ишлар органлари ходимлари томонидан қўлга олинган.
«Ҳозирда тергов ҳаракатлари олиб борилмоқда», — дейилади ИИВ ахборотида.
Изоҳ (0)