Фарғона вилоятининг Риштон туманида ҳуқуқбузарликлар профилактикаси ва жиноятчиликка қарши курашишга қаратилган тадбирлар бўлиб ўтди. Бу ҳақда Фарғона вилояти ҳокимлиги ахборот хизмати «Дарё»га маълум қилди.
Профилактика куни тадбирлари доирасида Бўстон қишлоғи ҳудудида 347-сон милиция таянч пункти участка нозири Ғайрат Ниёзов биринчи марта кенг жамоатчилик, маҳалла фаоллари олдида ҳисобот берди.
Участка нозирининг маълум қилишича, ҳудудда жорий йилнинг январь—апрель ойлари давомида бирорта жиноят содир этилмаган.
Йиғилишда туман фаоллари ҳам сўзга чиқиб, куннинг долзарб мавзулари бўйича маърузалар қилган.
Шунингдек, Риштон иқтисодиёт ва сервис касб-ҳунар коллежида «Ҳоким ва ёшлар» учрашуви ўтказилди. Учрашувда коллежнинг 250 нафарга яқин ўқувчилари, уларнинг ўқитувчи ва мураббийлари иштирок этди.
Учрашув давомида туман ҳокими таълим соҳасида яратилаётган ислоҳотлар, тизимдаги ўзгаришларни фактлар ва мисоллар асосида тушунтириб берди.
«Ўқувчиларнинг коллеждаги ўқув жараёни бўйича мавжуд камчиликлар, малакавий амалиётлар ўташ ва ишга жойлашиш масалалари юзасидан берилган саволларига жавоблар берилди», — дейилади вилоят ҳокимлиги ахборотида.
Изоҳ (0)