Жорий йил бошидан буён Ўзбекистоннинг сел ва кўчки хавфи бор ҳудудларида истиқомат қилувчи 696 киши ва 151 уй хўжалиги хавфсиз ҳудудларга кўчирилди. Бу ҳақда, ФВВ матбуот хизматига асосланиб, «Газета.uz» хабар бермоқда.
Шулардан 515 нафари Сурхондарё, 71 киши Самарқанд, 61 киши Тошкентда ва 11 киши Наманган вилоятларида вақтинча кўчирилган.
Қашқадарё вилоятида 21 киши доимий яшаш учун бошқа жойга кўчирилган. Уларнинг хавфли зонада жойлашган уйлари бузиб ташланган. Махсус муҳандислик техникаси ёрдамида мутахассислар кўчки массасини бўшатиб, беш кишидан иборат хўжаликнинг хавфсизлигини таъминлаган.
Самарқанд вилоятида икки уй хўжалигида истиқомат қилувчи 12 кишини ҳимоя қилиш мақсадида қирғоқни мустаҳкамлаш ишлари ўтказилган.
Йил бошидан бери Андижон, Наманган, Самарқанд ва Фарғона вилоятлари дарё ва сойлари қирғоқларида 167,6 минг кубометр ер ва 13,5 минг кубометр тош массаси миқдоридаги муҳандислик-техник ва бошқа ҳимоя тадбирлари амалга оширилган.
Изоҳ (0)