550 қути тамаки маҳсулотини нон орасига яшириб, чегарадан олиб ўтишга уринган тошкентлик аёл қўлга тушди
«Тошкент-Аэро» ихтисослаштирилган божхона комплекси ходимлари тамаки маҳсулотларини яширин равишда олиб чиқишга навбатдаги уринишни фош этди. Бу ҳақда Ўзбекистон Республикаси Давлат божхона қўмитаси матбуот хизмати хабар бермоқда.
«Тошкент—Истанбул» рейси бўйича парвозга отланган пойтахтлик Хушнода Ярашева хорижда пуллаш учун кўзланган 2 турдаги 550 қути сигаретни божхона назоратидан яширинча олиб чиқиш мақсадида уларни нонлар орасига яхшилаб беркитган ва кўриниб қолмаслиги учун елим скотч ёрдамида яхшилаб ўраган. Аммо, қоидабузар назорат-рентген аппарати экранида ушбу сигаретлар кафтдек акс этишини инобатга олмаган.
Амалдаги тартибларга риоя қилмай, нақд хорижий валюталарни Ўзбекистондан яширин йўллар билан олиб чиқишга уриниш ҳолатлари ҳам қайд этилмоқда.
Қашқадарё вилояти божхона бошқармасининг «Қарши—Керки» чегара-божхона пости ходимлари нақд хорижий валюталарнинг яширин олиб чиқилишига доир бир нечта божхона қоидабузарликларини фош қилди.
Туркманистон Республикаси фуқароси Б.Бобоназаров 2 150 АҚШ долларини яширинча олиб чиқиш учун ноутбук учун мўлжалланган сумкада кўз илғамас бўшлиғига бекитгани божхона кўриги давомида фош этилди.
Унинг юртдоши С.Пирханова эса 650 АҚШ долларини багаж тутқичлари орасига яширганча олиб чиқиб кетаётган пайтда тўхтатиб қолинди.
Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда.
Хусусан, нақд хорижий валюталарни оёқ кийимлари ичига, багаж тутқичлари орасига ёки ноутбук сумкасида яширин чўнтак очиб, беркитганча олиб ўтган хорижий шахсларнинг нақд хорижий валюталари мусодара қилиниб, энг кам иш ҳақининг беш бараваридан ўн бараваригача жарима чораси қўлланилади.
«Дарё»нинг Telegram’даги расмий канали — @toshqindaryo’га аъзо бўлинг!
