Россия Украина пойтахти Киевга 31 июль куни ракета ва дронлар билан йирик ҳужум уюштирди. Оқибатда ҳалок бўлганлар сони бугунгача 31 нафарга етгани маълум қилинди. Бу ҳақда Euronews хабар берди.
Украина Ички ишлар вазирлиги маълумотларига кўра, Украина пойтахтининг бир қанча ҳудудларига берилган зарба қурбонлари орасида 5 нафар бола, жумладан, 2 ёшли бола ҳам бор. Яна 159 киши, жумладан 16 бола жароҳатланган. Мамлакат президенти Владимир Зеленский ушбу ҳужумни “қабиҳлик”ка йўйиб, бу Россияга нисбатан босимни кучайтириш ва янги санкциялар жорий этиш заруратини оширишини таъкидлаган.
“Июль ойининг ўзида Россия Украинага қарши 5 100 дан ортиқ ҳаво бомбасидан, 3 800 дан ортиқ ‘Shahed’ дронидан ва 260 га яқин ракетадан — улардан 128 таси баллистик — фойдаланди. Буни фақат АҚШ, Европа ва бошқа халқаро кучларнинг биргаликдаги ҳаракатлари тўхтата олади”, деди Зеленский.
Украина ҳарбий-ҳаво кучларининг маълум қилишича, 31 июлга ўтар кечаси Россия томонидан 309 та дрон ва 8 та ракета учирилган. Ҳаво ҳужумидан мудофаа тизими уларнинг аксариятини уриб туширишга муваффақ бўлган, бироқ Киев шаҳри бир нечта қанотли ракеталар зарбасига учраган.
Киевдаги 9 қаватли турар жой биносининг катта қисми қулаб тушган. Вафот этганлар орасида юқори лавозимли полиция лейтенанти Лилия Степанчук ҳам борлиги маълум қилинган. Свиатошинский ва Соломянский ҳудудлари энг кўп зарар кўргани айтилмоқда. Ҳужум оқибатида мактаб, болалар боғчаси, шифохона ва олий ўқув юрти бинолари ҳам зарар кўрган. Камида 37 киши ўз уйидан айрилган.
АҚШ президенти Дональд Трамп Россия раҳбари Путиндан Украинага ўт очишни тўхтатишишини бир неча бор талаб қилганига қарамай, Москва ҳамон ҳужумларни тўхтатгани йўқ.
Трамп 29 июль куни Москвадан тинчлик сулҳига эришишини сўраб, унга 10-12 кун муддат берган. Ундан олдинроқ эса бу муҳлат 50 кунни ташкил этарди. АҚШ раҳбари агар Путин Украинага қарши кенг кўламли урушни ҳеч бўлмаганда вақтинча тўхтатишга рози бўлмаса, мамлакатга нисбатан янада оғирроқ санкциялар қўллаш билан таҳдид қилмоқда.
Изоҳ (0)