Ўзбекистон Президенти Шавкат Мирзиёев Каттақўрғон туманига ташриф буюриб, Каттақўрғон сув омбори ҳавзасида балиқчиликни ривожлантириш бўйича амалга оширилаётган лойиҳалар билан танишди. Бу ҳақда ЎзА хабар бермоқда.
Мавзуга доир: Шавкат Мирзиёев Самарқанд вилоятида амалга ошириладиган йирик чорвачилик ва паррандачилик лойиҳалари билан танишди
Лойиҳани ҳаётга татбиқ этиш учун 5,1 миллиард сўм маблағ сарфланади ва натижада балиқчилик хўжаликларига йилига 2 миллион дона чавоқ, 500 миллион дона личинка, минг тонна омихта ем етказиб берилади. 400 тонна балиқ қайта ишланади, 200 тонна қадоқланган, 50 тонна дудланган балиқ маҳсулотлари аҳоли истеъмоли учун йўналтирилади.
Хўжаликда 40 янги иш ўрни яратилади.
Ўзбекистон Президенти Паяриқ, Самарқанд туманларида «Мароқанд балиқ саноат агро» агрофирмаси ва «Оқ амур балиқлари» фермер хўжалиги томонидан «Ипотека-банк» билан ҳамкорликда амалга оширилаётган лойиҳаларни кўздан кечирди. Мазкур лойиҳага кўра 450 гектар сув майдонида балиқ чавоқларини кўпайтириш ва балиқ маҳсулотларини қайта ишлаш йўлга қўйилади. Ушбу ишларни истиқболли ташкил этиш учун 12 миллиард сўм маблағ жалб этилади.
Лойиҳанинг ишга тушурилиши натижасида балиқчилик хўжаликларига 10 миллион дона чавоқ, 300 тонна омихта ем етказиб берилади, 500 тонна балиқ қайта ишланади. 300 тонна қадоқланган, 50 тонна дудланган балиқ маҳсулотлари халқ истеъмоли учун бозорларга чиқарилади.
Лойиҳада 50 кишини иш билан таъминлаш кўзда тутилган.
Шавкат Мирзиёев мазкур лойиҳалар билан танишар экан, халқимиз «луқмаи ҳалол» деб таърифлайдиган балиқ етиштиришни янада ошириш, бунда замонавий технологиялардан унумли фойдаланиш, маҳсулотларни нафақат ички бозорга, балки экспортга ҳам йўналтириш бўйича зарур кўрсатма ва топшириқлар берди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)