Миллиардер Алишер Усмонов Алексей Навальнийнинг Россия бош вазири Дмитрий Медведев ҳақидаги фильмида тилга олинган битим бошқа ер майдони бўйича олди-сотдининг бир қисми бўлганини айтди, деб ёзади «РИА Новости».
Унинг сўзларига кўра, Навальнийнинг «текшируви»да тилга олинадиган ер майдонини Усмонов дастлаб ўз синглиси учун сотиб олган, аммо у у ерда яшашни истамаган.
«Агар Навальний менинг компанияларим манфаатларига вакиллик қилувчи расмий шахслардан сўраганида, аниқ жавоб оларди ва ҳеч нарсани тўқиб чиқариш керак бўлмасди. Уни қизиқтираётган шартнома жаноб Елисеев раҳбарлигидаги фонднинг бошқа ер майдонига тегишли битимнинг бир қисми эканлигини тушунтиришган бўларди», — деди Усмонов «Ведомости» газетасига берган интервьюсида.
Бизнесмен аниқлик киритишича, Илья Елисеевнинг «Соцгоспроект» фондига ушбу ер майдонини топширган, эвазига эса ўз ер майдони ёнидан бошқа ерга эга бўлган. Усмонов айтишича, фонд унинг ер майдони яқинида бешта уй-жой қуришдан иборат девелоперлик лойиҳасини амалга оширишни режалаштирган.
Аввалроқ Алишер Усмонов мухолифатчи Алексей Навальнийни судга бериши ва ҳуқуқ-тартибот органларига ариза ёзиб, унинг гапларини туҳмат деб аташини айтган эди.
Навальний YouTube’га гўёки Дмитрий Медведевнинг мол-мулки ҳақида ҳикоя қилувчи фильмни жойлаган, унда Усмонов ҳам тилга олинган эди.
Изоҳ (0)