Миср парламенти президент Абдулфаттоҳ ас-Сисийнинг мамлакатда уч ойлик фавқулодда ҳолат тартибини жорий этиш ҳақидаги қарорини маъқуллади. Бу ҳақда «Коммерсантъ» хабар бермоқда.
Миср конституциясига мувофиқ, мамлакат парламенти маъқулламагунига қадар, Миср президентининг фавқулодда ҳолат тартиби ҳақидаги қарори кучга кирмайди.
Миср Миллий мудофаа кенгашининг 9 апрель куни бўлиб ўтган мажлисидан сўнг Абдулфаттоҳ ас-Сисий мамлакатда фавқулодда ҳолат тартиби жорий этилишини маълум қилди. Шунингдек, президент Террорчиликка қарши кураш бўйича олий кенгаши тузилишини ҳам эълон қилди.
Куч тузилмаларига чекланмаган ваколат берувчи фавқулодда ҳолат тартиби Мисрда 1981 йилдан 2012 йилга қадар амалда бўлган. Жорий фавқулодда ҳолат тартиби эса 9 апрель куни мамлакатнинг Танта ва Искандария шаҳарларидаги насроний черковларида юз берган икки портлашдан сўнг жорий этилмоқда.
Мазкур терактлар учун жавобгарликни ИШИД террорчилик ташкилоти ўз зиммасига олган, ҳодиса оқибатида, сўнгги маълумотларга кўра, 44 киши ҳалок бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)