Қорақалпоғистоннинг Мўйноқ тумани ҳудудида жойлашган Судочье кўлида айни пайтда қушлар салтанати ҳукм сурмоқда, дея хабар бермоқда Қорақалпоғистон Республикаси Вазирлар Кенгаши ахборот хизмати. Умумий майдони 50 минг гектардан ошадиган ушбу кўллар тизимида ҳозирда 230 дан ортиқ турдаги минглаб кўчманчи ва доимий яшовчи қушлар мавжуд бўлиб, уларнинг орасида фламинго қушлар тўдасини ҳам учратиш мумкин.
Кейинги 10 йил ичида Судочье кўлида фламинго тўдаси пайдо бўлди. Судочье кўллар тизимида табиатда ноёб саналадиган пуштиранг фламинголарнинг мавжудлиги ва шу жойда қушнинг уялари топилгани Ўзбекистон орнитолог-олимларининг катта илмий кашфиёти бўлди.
Кейинги йилларда Жанубий Орол атрофида фламингонинг учраши сезиларли даражада кўпайди. Бу жойда фламинго учиб ўтувчи қуш тури сифатида белгили. Лекин 2014 йил 23 май куни Судочье кўллар тизимида олиб борилган орнитологик тадқиқотлар вақтида кўлнинг шарқий чегарасидаги кичикроқ оролда фламингонинг катта уяловчи колонияси топилди. Бу ҳақиқий илмий янгилик бўлди. Биз оролда фламингонинг 7000 особи ва 3000 га яқин уясини санадик. Бу Ўзбекистондаги энг катта колония бўлиб, у бутун дунёдаги популяциянинг 1,4 фоизини ташкил қилади.Қорақалпоқ давлат университети ўқитувчиси, биология фанлари номзоди Я.Аметовнинг таъкидлашича, Судочье кўли кўчманчи қушларнинг олис-олисларга учиши учун куч тўплаш мақсадида қўним топадиган мўл озуқа манбаи ҳам саналади. Фламинго қушлари Қорақалпоғистоннинг бир неча жойларида, хусусан, Возрождение оролида, Мўйноқда, Ғарбий Қаратерен кўлида, Шегекўлда, Сариқамиш кўлида, Амударёнинг ўнг қирғоғида, Жалтирбас кўлида ва бошқа жойларда учраган, лекин Судочьедаги каби йирик колониянинг пайдо бўлиши аввал кузатилмаган.Исламбек Арепбаев, орнитолог-олим
Орнитолог-олимларнинг билдиришича, ҳозирги пайтда Судочье кўлида фламинго ва бошқа камёб учрайдиган қушлар учун биринчи хавф ва муаммо, бу — сувнинг етишмовчилиги. Иккинчи хавф ва муаммо, бу — ноқонуний овчилик ёки браконерликдир.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)