Reddit фойдаланувчилари дунёнинг энг бой одамлари аслида нималарга қизиқишини фош қилди. Якунда муҳокама 14 мингдан ортиқ изоҳ йиғди.
AskReddit махсус бўлимига жойланган «Супербойлар оддий одамлар умрида эшитмаган қандай нарсаларга ишқибоз?» — деган саволга ресурс ташрифчилари миллионерларнинг ноодатий мойилликлари ҳақида минглаб мисолларни жўнатди.
«Улар кечки овқатни чет элда ейди. Мен шундай бой лондонликлар ҳақида эшитганманки, улар ўз вертолётларига миниб, кечки овқатни ейиш учун Парижга учиб кетади, сўнг яна қайтиб келади», — деб ёзди улардан бири.
«Улар мавсумий жиҳозлардан фойдаланади: ‘Апрель ҳам келиб қолибди. Баҳорги кушетка ва креслоларни чиқариш, қишки овқатланиш столини ва Хитой сервизини эса баҳоргисига алмаштириш вақти келди. Ва, яхшиси, барча мос пардаларни олиш керак’», — дея яна бир фойдаланувчи бойларни масхара қилди.
Баъзилар эса миш-мишларни айтиш ўрнига, ўз ҳаётида учратган воқеалар билан бўлишди. «Мен аввал ишлаган компания бош директори ўз ҳовлисида улкан бассейн қаздириб, у ерга чўкиб кетган кемани киритганди, у акваланг билан бассейнга тушиб, кема атрофида сузиб юрарди», — деб ёзди у.
«Мен Нью-Йоркда ҳашаматли апартаментлар билан битта бинода жойлашган китоб дўконида ишлаганман. Бир куни у ерга эр-хотин кириб келди. Улар энди кўчиб келганини, уй кутубхонасини чиройли қилиб ташкил қилиш учун уларга бир дунё китоб кераклигини айтди. Улар бизга қандай китоблар уларга кераклиги ҳақида кўрсатма берди. Аммо асосан бизнинг тавсияларимизга таянган ҳолда, уларни ақлли ва ўқимишли қилиб кўрсатадиган асарларни кўтарасига сотиб олди. Улар кимларгадир ўз кутубхоналари борлигини кўз-кўз қилиш учун бизга 25 минг доллар тўлади», — дея сўзлаб берди яна бир фойдаланувчи.
Изоҳ (0)