Самарқанднинг «Динамо» клуби собиқ аъзоси Сирожиддин Сайфиевнинг саратон касаллигига чалингани маълум қилинганди. Кейинроқ блогер Фарҳод Норбўтаев унинг сўнгги 1 йилда бошдан кечирганлари ҳақида пост ёзди.
Маълум қилинишича, постни эълон қилиш 2015 йилдаёқ режалаштирилган бироқ футболчининг ўзи буни истамаган. Сайфиев саратон сабаб ўлим билан курашаётганини эшитгач эса блогер футболчидан кечирим сўраб, уни омма учун очиқ қилган.
2015 йилнинг 24 октябрь куни Тошкентда «Локомотив»га қарши кечган ўйин Сирожиддин учун профессионал фаолиятидаги сўнггиси бўлди. Ўша ўйинда у «Динамо» учун борини бериб ўйнади. Аммо 84-дақиқада содир бўлган ўша машум воқеа ҳаётини тубдан ўзгартириб юборди.Блогпостда футболчининг кейинги ҳаёти, Самарқанд клуби раҳбарларининг қилмишлари ҳикоя қилинган. Бундай ўзбошимчалик қачонгача давом этади қабилида саволлар ёғдирилган.Алам қиладигани шундаки, жароҳатдан сўнг тез тиббий ёрдам машинасида уни пойтахтдаги «Травматология ва ортопедия республика илмий текшириш институти» шифохонасига олиб келишди. Бироқ футболчининг ортидан «Динамо» клуби раҳбариятидан ҳеч ким бормади.
Футболчи шундай ҳикоя қилганди: «Оёғим синган. Оғриққа чидай олмайман. Операция бўлишини тўрт соат кутиб ётдим. Ўша пайтда фақатгина жамоадошим Зайниддин Тожиев менинг ёнимда турди. Бунинг учун Зайниддин акага катта раҳмат айтаман».
«Операциядан сўнг қарасам, палатадаги шкафчада пул турибди. Отамга ҳеч кимдан пул сўраманг, клуб ойлигимни берса, ҳамма харажатларга етади деб айтгандим. Аммо отамнинг қаршилигига қарамай, Артур Геворкян ва бошқа кўплаб футболчилар соғайиб кетишим учун пул ташлаб кетишган экан».
Ана шундай қийин аҳволда қолган пайтда клуб Сирожиддин Сайфиевнинг ойлиги тугул, жароҳат олганда тўланиши лозим бўлган пулни ҳам бермади. Унга ажратилган суғурта пулини эшитиб очиғи кулишни ҳам, йиғлашни ҳам билмай қолдим. Атиги 174 минг сўм.
Фарҳод Норбўтаев, блогер
Ойлик маошини олиш мақсадида Тошкентдан Самарқандга келган Сирожиддин билан ҳар сафар кўришардик. Учрашувларнинг бирида у ҳамон пулларини ололмай ҳалак бўлиб юрганини, охирги чора сифатида Ўзбекистоннинг биринчи Президенти Ислом Каримовга мурожаат қилганлигини айтиб берди. Айнан шундан сўнг пайтавасига қурт тушган «Динамо» клуби раҳбарияти унга ойлик маоши ва мукофот пулларини беришни ваъда қилган. Ҳатто, аниқ санасини айтиб, ўша куни барча пулларини беришни айтишганди. Айтилган муддат уч-тўрт маротаба ўзгардики, у пулларини ола билмади. Ваҳолангки, 2012 йилги футболчининг клуб билан тузган шартномасида у машғулот ёки ўйин жараёнида жароҳат олса, иш ҳаққи юз фоиз тўлаб берилиши келтириб ўтилган.Блогернинг қайд этишича, вазият шунгача борганки, собиқ футболчи Самарқанд клуби раҳбарияти билан кўришиб, ортга бор-йўғи 2000 сўм билан қайтган. Чунки унда пулларини олиш учун умид бўлган ва Самарқандга борган. Маълум қилинишича, «Динамо»нинг Сирожиддин Сайфиевдан 60 миллион сўм қарзи бор.Фарҳод Норбўтаев, блогер
Оғир аҳволда қолган футболчи тўлиқ соғайиб кетиши учун маблағ керак. Шу мақсадда клубда қолиб кетган ойлик маошлари ва мукофот пулларини олиш мақсадида Ўзбекистон Президеннинг виртуал қабулхонасига мурожаат қилмоқчи эди. 31 март куни виртуал қабулхонага юбормоқчи бўлган шикоят хатини таҳрир қилиш мақсадида менга юборишини айтганди. Афсуски, ўша кунги суҳбатимиздан сўнг Сирожиддин билан бошқа гаплашиш имкони бўлмади. 4 апрель куни эса интернет тармоғида унинг оғир хасталикка чалинганлигини ҳақидаги нохуш хабарни эшитдим.Маълумот учун, аввалроқ «Championat.asia» нашри «Динамо» клубининг Сирожиддин Файзиевдан 70 миллионга яқин қарзи борлиги ҳақида айтганди.Наҳотки «Динамо» клуби раҳбарияти «ўзига хон кўланкаси майдон» бўлиб қолган бўлса? Ахир ҳар йили клубга 5—7 миллиард сўм маблағ ажратилади-ку? Ажратилган шунча маблағ футболчиларга берилмаган бўлса, қаерга сарфланган?
Фарҳод Норбўтаев, блогер
Изоҳ (0)