Йил бошидан буён дунёда кўплаб меҳмонхоналар ва хостеллар очилишга улгурди. Улар орасида ўта ноодатийлари ҳам бор. Кимдир меҳмонларни ўзига хос дизайн билан жалб қилмоқчи бўлса, бошқалар кўрсатиладиган хизматлар рўйхати билан ҳайратга солмоқчи бўлади, яна баъзилар эса ўз ҳажми билан таассурот қолдиришни истайди. Мақолада сўнгги бир неча ой ичида илк сайёҳларни қабул қилган энг ғаройиб меҳмонхоналар ҳақида ҳикоя қиламиз.
Англиялик таниқли кўча рассоми Бэнкси ўз меҳмонхонасини очди. Walled Off меҳмонхонаси Фаластин ва Исроил чегарасида ташкил топди. Меҳмонхонада тўққизта хона ва битта сют бор. Деворларни Бэнксининг асарлари безатади.
Мальдив оролларида ҳашаматли меҳмонхоналар тез-тез очилади. Аммо Лавиани атоллидаги беш юлдузли Hurawalhi Island Resort қарийб олти метр чуқурликдаги сувости ресторани билан мақтана олади.
Испаниянинг In-Tenta дизайнерлик компанияси яратган иншоотни меҳмонхона ҳам эмас, балки портатив меҳмонхона хонаси деб аташ мумкин, уни исталган жойга ўрнатса бўлади. Drop box деб ном олган конструкция тўрт кишига мўлжалланган. Икки кишилик вариант ҳам кўзда тутилган. Хонада душ хонаси ва айвон бор.
Сингапур марказида йил бошида Oasia гулли меҳмонхонаси илк меҳмонларни қабул қилди. 27 қаватли бино фасади ҳақиқий майсалардан иборат тўр билан қопланган. Бундан ташқари, тўртта яшил айвон ҳам бор.
Япониянинг Тиба префектурасида очилган Henn na Hotel меҳмонхонасида деярли ходимлар йўқ. Рўйхатга олиш пештахтаси ортидаги қизларни ва бошқа ходимлар ўрнини роботлар эгаллаган.
Юк контейнерларидан йиғилган Quadrum меҳмонхонаси Грузияда, Юқори Гудаурида очилди. Гудаури — машҳур тоғ-чанғи курорти. Меҳмонхона сайёҳларга бир кишилик ва оилавий хоналарни, шунингдек, люкс хоналарни таклиф қилади.
Изоҳ (0)