Содиқ Сафоев бошчилигидаги Ўзбекистон делегацияси Грузияга ташриф буюрди

Олий Мажлис Сенати раисининг биринчи ўринбосари Содиқ Сафоев бошчилигидаги Ўзбекистон делегацияси Грузияга ташриф буюрди, деб ёзади UzDaily.

Ўзбекистон делегацияси Грузия парламенти раиси Ираклий Кобахидзе билан музокаралар ўтказди.

Музокаралар доирасида томонлар икки томонлама муносабатлар, жумладан, минтақадаги транспорт ва инфратузилма лойиҳаларини ривожлантириш масалаларини муҳокама қилди.

Улар, шунингдек, Грузияда Ўзбекистоннинг дипломатик ваколатхонасини очиш истиқболларини муҳокама қилди. Сафоев Кобахидзени Ўзбекистонга таклиф қилди.

Ўзбекистон  делегацияси, шунингдек, Грузия иқтисодиёт вазири Георгий Гахария билан учрашув ўтказди.

Томонлар экспорт салоҳиятини ошириш, эркин савдо режимида маҳсулотлар транзитини йўлга қўйиш ва икки томонлама ҳуқуқий базани такомиллаштиришга келишиб олди.

Ўзбекистон ва Грузия вакиллари туризм, алоқа ва ташқи савдо каби соҳалардаги ҳамкорлик истиқболларини муҳокама қилди ва янги лойиҳалар режаларини белгилаб олди.

Транспорт соҳаси ва юклар транзити Грузия—Ўзбекистон икки томонлама алоқаларининг муҳим йўналишлари ҳисобланади.