Ўзбекистон Сенати Судьялар олий кенгаши раисини тайинлади ва Президентнинг айрим фармонларини тасдиқлади

29 март куни Тошкент шаҳрида Ўзбекистон Олий Мажлиси Сенатининг тўққизинчи ялпи мажлиси ўз ишини давом эттирди. Бу ҳақда ЎзА хабар бермоқда.

Хабар беришларича, сенаторлар Олий Мажлис Сенатининг Бюджет ва иқтисодий ислоҳотлар масалалари қўмитаси раисини сайлаш, Ўзбекистон Судьялар олий кенгашининг раисини тайинлаш ҳамда Ўзбекистон Президентининг айрим фармонларини тасдиқлаш тўғрисидаги масалаларни кўриб чиққан.

Расмий ахборотда Сенатнинг тегишли қўмитасига ва Судьялар олий кенгашига кимлар раис этиб тайинлангани маълум қилинмаган, Президентнинг айнан қайси фармонлари тасдиқланганига аниқлик киритилмаган.

«Ялпи мажлисда Сенат ваколатига кирадиган бошқа масалалар ҳам кўриб чиқилди. Барча кўрилган масалалар юзасидан тегишли қарорлар қабул қилинди. Сенат ялпи мажлиси давомида 21 та масала, шунингдек, суд-ҳуқуқ тизимини изчил ислоҳ қилишга, фуқаролар ҳуқуқ ва манфаатларини ҳимоя қилишга, бозор ислоҳотларини янада чуқурлаштиришга қаратилган 9 та қонун кўриб чиқилди. Шунинг билан Олий Мажлис Сенатининг тўққизинчи ялпи мажлиси ўз ишини якунлади», — дейилади ЎзА ахборотида.

«Дарё»нинг Telegram’даги расмий канали — @toshqindaryo’га аъзо бўлинг!