ЖЧ—2018 саралашининг 7-туридан кейин БАА бош мураббийи Маҳди Али истеъфога чиқарилди. Бу ҳақда мураббийнинг ўзи Австралияга қарши ўйиндан кейинги матбуот анжуманида эълон қилди.
Ортда қолган етти ўйин давомида Амирлик термаси 9 очко жамғаришга муваффақ бўлди. Олдиндаги уч тур жамоанинг кучли учликдан жой олиши учун етарли бўлмаслиги мумкин.
Маҳди Али бошқарувида БАА саралашнинг ҳал қилувчи босқичини сенсацион ғалаба билан бошлаб, Японияни сафарда таслим қила олганди — 2:1. Кейинроқ БАА жавоб ўйинини ўз уйида ўтказиб, кунчиқар юрт термасидан 0:2 ҳисобида енгилди. Австралия сафарда 1:0, ўз майдонида 2:0 ҳисобларида Амирлик термасини мағлуб этди. Саудиядаги ўйин эса 0:3 ҳисобида якунига етди. Али жамоаси, шунингдек, Таиландни 3:1, Ироқни 2:0 ҳисобларида таслим қилишга муваффақ бўлганди.
Маҳди Али БАА ёшлар терма жамоаси билан 2009 йил Осиё чемпионлигини қўлга киритган бўлиб, финалда Ўзбекистон ёшларини таслим қилганди. Кейинроқ унинг шогирдлари Лондон—2012 Олимпиадасига ҳам йўл олди. Ҳал қилувчи ўйинда БАА яна бир бор Ўзбекистондан устун келиб, Вадим Абрамов бошқарган жамоани Тошкентда 3:2 ҳисобида енгганди.
Навбат Жаҳон чемпионатига келганида эса Амирлик термаси кетма-кет икки бор ундан четда қолишга яқин.
Менинг кетар вақтим келди. Мен Ироқ билан ўйин олдиданоқ истеъфо сўраб мурожаат қилганимда, БАА футбол федерацияси шошмай туришимни сўраганди. Энди эса 5 йил давом этган ҳаётимнинг энг яхши онларидан кейин сизлар билан хайрлашаман.Маълумот учун, Амирлик термаси навбатдаги уч турда Саудияни қабул қилади, Таиланд ва Ироққа қарши эса сафар ўйинларида иштирок этади. Бу учрашувларда Амирлик термаси 9 очко ишлаб олиб, мундиал учун курашни давом эттириши ҳам мумкин эди.Маҳди Али, БАА мураббийи
Изоҳ (0)