Фарғона шаҳрида «Нуронийлар маскани» фойдаланишга топширилди

Фарғона шаҳрида замонавий меъморчилик асосида бунёд этилган «Нуронийлар маскани» фойдаланишга топширилди. Бу ҳақда ЎзА хабар бермоқда.

ЎзАнинг ёзишича, вилоят марказида бунёд этилган «Нуронийлар маскани» ҳамда «Нуроний» жамғармаси Фарғона шаҳар бўлими биноси кекса авлод вакилларига Наврўз туҳфаси бўлди.

Ўзбекистон халқ устаси Муҳаммадали Юнусов каби моҳир ҳунармандлар қўлида сайқал топган айвонлар, жимжимадор ва нақшинкор безакли устунлар янги ижтимоий марказ ҳуснига ҳусн қўшган.

«Нуронийлар маскани»да кексалар учун барча шароит яратилган. Кутубхона, тиббиёт ва махсус тренажёрлар билан жиҳозланган даволаш-жисмоний тарбия заллари, шахмат-шашка клуби, чойхона улар ихтиёрида.

Тантанали маросим сўнгида нуронийларга байрам дастурхони ёзилди. Мажмуанинг очилишида Фарғона вилояти ҳокими Шуҳрат Ғаниев сўзга чиқди.

«Дарё»нинг Telegram’даги расмий канали — @toshqindaryo’га аъзо бўлинг!