АПЛ чемпионлиги учун курашаётган олти клубнинг «Юнайтед»дан бошқа ҳаммаси еврокубоклардан четда қолди

Европа лигасининг нимчорак финалини муваффақиятли якунлаган «Манчестер Юнайтед» халқаро майдондаги иштирокини давом эттирадиган бўлди.

Англия чемпионлиги учун кураш олиб бораётган олти клубнинг 5 таси эса еврокубоклардан чиқиб кетган. Пешқадам «Челси» ва «Ливерпуль» ўтган йилги муваффақиятсиз натижалари сабаб халқаро майдон чиптасидан қуруқ қолишганди. «Арсенал» Чемпионлар лигасида «Бавария, «Манчестер Сити» эса «Монако» довонидан ўта олмади. «Тоттенҳэм» Европа лигасида ҳам муваффақиятли иштирок эта олмади.

Чемпионлар лигасида Англиядан «Лестер» иштирокини давом эттираётган бўлса-да, мазкур клуб ўз мамлакатида чемпионлик учун эмас, лигада жон сақлаб қолиш учун курашмоқда. Европа лигасида эса фақатгина «Манчестер Юнайтед» бор.

Мен «Манчестер Сити»нинг Чемпионлар лигасидан чиқиб кетганидан афсусландим. Ҳазиллашаётганим йўқ, жиддий айтяпман. Чунки бу бизга кўп томонлама қийинчилик туғдиради.

Биздан олдинда бораётган беш клубнинг бирортаси халқаро майдонда иштирок этаётгани йўқ. Демак улар мавсумнинг қолган қисмида ҳафтада 1 та учрашув ўтказади. Улар чарчаш нима эканини жуда яхши билади. Биз эса ҳафтасига икки марта ўйнаш учун курашамиз.

Жозе Моуриньо, «Манчестер Юнайтед» бош мураббийи