Инсон ҳуқуқлари бўйича миллий марказ директори Акмал Саидов Женевада БМТ Инсон ҳуқуқлари кенгаши 34-сессияси доирасида халқаро ташкилотнинг мазкур масалалар бўйича олий комиссари Зайд Раад ал-Ҳусайн билан учрашди. Бу ҳақда «Жаҳон» ахборот агентлиги хабар бермоқда.
Музокаралар чоғида Ўзбекистоннинг БМТ билан инсон ҳуқуқлари борасидаги ҳамкорлиги ҳолати ва истиқболлари муҳокама этилди.
Олий комиссар қонун устуворлиги ва суд-ҳуқуқ тизими ислоҳоти Ўзбекистоннинг 2017—2021 йилларга мўлжалланган Ҳаракатлар стратегиясининг беш асосий йўналишидан бири этиб белгиланганига юқори баҳо берди. У мазкур стратегиянинг тегишли бандларини амалга оширишда кўмак беришга тайёрлигини маълум қилди.
Шунингдек, Зайд Раад ал-Ҳусайн Ўзбекистоннинг БМТ ҳуқуқ ҳимояси тизимлари билан ҳамкорлиги ҳақида ижобий фикрлар билдирди.
Учрашув давомида БМТ инсон ҳуқуқлари бўйича олий комиссарига Ўзбекистонга ўзига мақбул пайтда ташриф буюриш таклиф этилди ва бу таклиф мамнуният билан қабул қилинди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)