Олий Мажлис Қонунчилик палатаси ва Сенати аъзоларидан иборат ишчи гуруҳ томонидан Наманган вилоятининг Уйчи туманида бевосита хонадонларда аҳоли вакиллари билан учрашувлар ўтказилди. Бу ҳақда палата матбуот хизмати хабар бермоқда.
Депутатлар ўрганиш ўтказилган кунларнинг ҳар бирида ўртача 600 дан ортиқ хонадонда бўлди. Кўтарилган масалаларнинг ярмидан кўпи жойида, қисқа муддатларда ҳал этилди.
Масалан, «Пастгузар» МФЙ, Чорвадор кўчаси 9-уйда яшовчи Мухторжон Эргашевга ишга жойлашишда амалий ёрдам кўрсатилди. «Умид» МФЙ, Ёғду кўчаси, 5-уйда яшовчи фуқаро Ширмон Толқанованинг аризаси эса якка тартибда уй қуриш учун кимошди савдосида қатнашиш учун рўйхатга олинди. «Гулзор» маҳалласида яшовчи Турғунжон Жўраев томонидан моддий ёрдам сўраб йўллаган мурожаат ўрганиб чиқилди ва амалий ёрдам кўрсатиш юзасидан маҳалла фуқаролар йиғинига тавсия берилди.
Ишчи гуруҳ аъзолари туман ички ишлар бўлими фаолияти билан ҳам яқиндан танишди. Туман ИИБ ЙҲХ гуруҳи инспекторлари билан суҳбатлашилганда, улар ўз фаолиятига оид бир қатор қонунлар билан таниш эмаслиги, иш жойида мазкур қонунлар умуман йўқлиги, шунингдек, фуқаролар қабулини ташкил этишга оид ҳужжатлар юритилмагани маълум бўлди.
ЙҲХ гуруҳи таркиби атиги 2 нафар инспектордан иборатлиги эса туман йўлларида ҳаракат хавфсизлигини таъминлашни қийинлаштирмоқда. Туман ҳудудидаги марказий кўчаларга йўл белгилари лозим даражада ўрнатилмаган, пиёдалар ўтадиган чорраҳаларда йўл чизиқлари чизилмаган. Одамлар кўп тўпланадиган жойларда автотураргоҳ ташкил этилмаган. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)