Россия мудофаа вазири Сергей Шойгунинг маълум қилишича, Сурия ҳукумат кучлари Россия авиацияси кўмагида Пальмирани эгаллади. Бу ҳақда Meduza хабар бермоқда.
Россия президенти матбуот котиби Дмитрий Песковнинг сўзларига кўра, бу ҳақда Шойгу президент Путинга ахборот берган. Пальмира шу вақтгача ИШИД террорчилик ташкилоти назорати остида қолаётган эди.
ИШИД жангарилари 2015 йил майида Пальмирани босиб олган. 2016 йил мартида Сурия армияси Россия авиацияси кўмагида террорчиларни шаҳардан қувиб чиқарган. Бу Россиянинг Суриядаги ҳарбий операцияси давомида эришилган энг катта ғалаба бўлган эди. 2016 йил декабрида ИШИД яна Пальмирани эгаллади, эътиборли томони, Сурия армияси шаҳарни атиги бир неча кун ичида бой берди.
1 март куни Ироқнинг Alsumaria телеканали ИШИД етакчиси Абу Бакр ал-Бағдодийнинг ўз тарафдорларига мурожаати ҳақида хабар берди. Унда террорчилик ташкилоти етакчиси жангариларни Ироқ ва Суриянинг тоғли ҳудудларига «қочиш ёки яшириниш»га чақирган.
Ироқда ҳукумат кучлари ва номунтазам жанговар тузилмаларнинг Мосул шаҳрига юриши давом этмоқда. Бу шаҳар ҳам ИШИД назорати остида эди. Ҳозирда жангарилар деярли қуршаб олинган, шаҳарнинг асосий чиқиш йўллари ёпиб қўйилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)