«Тошкент—Деҳли» йўналишидаги парвоз олдидан самарқандлик Ж.Аҳадов 11,5 миллион сўмдан ортиқ қийматдаги 180 грамм тиллани яширин йўллар билан олиб чиқишнинг антиқа йўлини танлади. Унинг шими тугмалари ясама тарзда олтиндан қўйилгани ва божхоначиларни чалғитиш мақсадида устидан бўялгани аниқланди. Бу ҳақда Давлат божхона қўмитаси ахборот хизмати хабар бермоқда.
Шунингдек, «Тошкент-Аэро» ихтисослаштирилган божхона комплекси ходимлари тилла ва заргарлик буюмларини божхона назоратидан четлаб олиб ўтишнинг жирканч усулини танлаган, яъни уларни ички аъзоларига бекитган ҳолда олиб ўтмоқчи бўлган бир қатор аёлларнинг қинғир қилмишларини фош қилди.
Жумладан, «Истанбул—Тошкент» рейси бўйича парвозини якунлаган Ш.Маматкулова дастлабки маълумотларга кўра қиймати 3,3 миллион сўмдан ортиқ бўлган 54 граммдан ошиқ заргарлик буюмларини шу усулда олиб киришга уринган пайтда тўхтатиб қолинди.
Шахсий кўрикдан ўтиш давомида божхоначилар ва холислар қаршисида уялиб қолганлардан яна бири Х.Аҳмедовадир. У ички аъзоларига яширганча қиймати салкам 5 миллион сўмлик 60 граммдан ортиқ заргарлик буюмларини Бокуга олиб чиқишни режалаштирган экан.
Ҳиндистонга йўл олган Д.Ходжибекова ва унинг синглиси Д.Мусабековалар ҳам божхоначиларнинг кўзини шамғалат қилишга уриниб, йирик миқдордаги қуйма тиллаларни ички аъзоларига яширганча олиб чиқаётган пайтда тўхтатиб қолинди.
Шахсий кўрикдан ўтказиш давомида Д.Ходжибекова оғирлиги 298 граммга тенг 3 дона қуйма тилла, Д.Мусабекова эса 253 грамм оғирликдаги 3 дона қуйма тиллани ноқонуний равишда олиб чиқишга урингани маълум бўлди.
Бу ҳам етмаганидек, ушбу шахслар картошка чипслари ва ярим тайёр угра қадоқлари ҳамда маҳсиларнинг ичига яширганча 2 турдаги 630 қутидан ортиқ сигаретни ҳам олиб чиқаётган экан.
Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)