Барселона шаҳрида бўлиб ўтаётган Mobile World Congress 2017 кўргазмасида Huawei P10 ва P10 Plus смартфонлари тақдим этилди. Бу ҳақда «Hi-Tech Mail.ru» хабар берди.
Аввалги моделлари каби, улар иккита асосий Leica камерасига эга, бироқ ўтган йилги моделдан фарқли равишда, P10 ва P10 Plus моделларидаги олд камералар ҳам Leica компаниясининг маҳсулоти ҳисобланади.
Huawei P10 5,1 дюймли Full HD дисплейга эга. Huawei P10 Plus эса 5,5 дюймли Quad HD дисплейи билан жиҳозланган. Смартфонлар экранлари Corning Gorilla Glass 5 2,5D ойнаси билан ҳимояланган. Экран остида жойлашган ягона тугмада бармоқ изи сканери жойлашган. Шунингдек, тугма анъанавий уч вазифани бажаради: свайп — кўп вазифалилик, тугмани қисқа босиш – орқага, тугмани узоқ босиш – бош саҳифа.
Смартфонларнинг Leica компанияси билан ҳамкорликда ишлаб чиқилган асосий камералари 12 ва 20 мегапикселли бўлиб, корпусдан чиқиб турмайди.
Метал корпусларни тайёрлашда «гиперолмосли» қоплама қўлланилган. Ишлаб чиқарувчининг таъкидлашича, корпусда чизиқлар ва бармоқ излари қолмайди.
Шунингдек, смартфонларнинг ялтироқ ва турли рангли кўринишлари тақдим этилди. Муҳим жиҳати шундаки, наноқопламалар смартфонларни сув ва чанг киришидан ҳимоя қилади.
Корпуснинг қалинлиги 7 миллиметрни ташкил қилади. Аккумуляторнинг сиғими Huawei P10 моделида 3200 мА/соат, P10 Plus’да эса 3750 мА/соат. Бу сиғим 2 – 2,5 кунга етади.
Huawei P10 Plus смартфонининг ўзига хос хусусиятларидан бири алоқа сифатининг яхшиланганидир. Ишлаб чиқарувчининг таъкидлашича, бу биринчи 4,5G-смартфон ҳисобланади. Смартфонда тўртта антенна ўрнатилган, бу кучсиз сигнал туфайли юз берадиган алоқадаги узилишларни 60 фоизга камайтиришга имкон беради. Huawei Geo Technology технологияси GPS йўлдошидан сигнал қабул қилишни мувозанатлаштиради.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)